जळगाव – शहरात अल्पवयीन मुलीवरील अत्याचार आणि ड्रग्ज रॅकेटच्या उघडकीस आलेल्या गंभीर प्रकरणावर पोलिस व महापालिका प्रशासनाने सोमवारी रात्री बुलडोझर कारवाई केली आहे. मनपा पथक आणि एमआयडीसी पोलिसांनी सोमवारी रात्री संयुक्त कारवाई करत ड्रग्ज पेडलर रईस हारून देशमुख (वय २७) याच्या सुप्रीम कॉलनीतील घरासमोरील अनधिकृत बांधकाम जमीनदोस्त केले.यावेळी जळगाव शहराच्या महापौर दीपमाला काळे यांच्यासह नगरसेवक व महापालिकेचे पदाधिकारी उपस्थित होते.
एका अल्पवयीन मुलीला ड्रग्जची सवय लावून तिच्यावर अत्याचार केल्याप्रकरणी आणि तिला घराच्या आवारात ड्रग्ज आणून दिल्याप्रकरणी निर्मल दिनेश तिवारी, जय चौधरी आणि गौरव पुरोहित यांच्याविरुद्ध रामानंदनगर पोलिस ठाण्यात गुन्हा दाखल होता. निर्मल व जय याची कसून चौकशी केल्यानंतर त्यांनी ड्रग्ज कुठून आणले, याची साखळी उघड झाली. स्थानिक गुन्हे शाखेने ३ जूनच्या रात्री बाजार समिती परिसरातून रईस हारून देशमुख, तौसिफ आसिफ सय्यद आणि कुणाल पाटील यांना अटक केली होती. तर या रॅकेटमधील अमजद ऊर्फ बिल्डर शेख व इम्रान उर्फ इमा भिस्ती हे दोघे अद्याप फरार असून, पोलिस शोध घेत आहेत.
उर्वरित आरोपींचीही कुंडली काढणार
एमआयडीसी पोलिसांनी या ड्रग्ज रॅकेटमधील रईस देशमुख, तौसिफ सय्यद, कुणाल उर्फ लकी पाटील, अमजद उर्फ बिल्डर शेख, इम्रान उर्फ इमा भिस्ती आणि अन्वर पटेल या सहा जणांच्या मालमत्ता कायदेशीर आहेत की नाही, हे तपासून कारवाई करण्याचे पत्र महापालिका आयुक्तांना दिले होते. या पत्रानंतर सोमवारी रात्री कारवाई करण्यात आली.
