नवराज्य Live न्यूज नेटवर्क
जळगाव : जिद्द, चिकाटी आणि अथक परिश्रमाच्या बळावर रामेश्वर कॉलनी, जळगाव येथील १८ वर्षीय भावेश अशोक पाटील याने भारतीय सैन्य दलातील अग्निवीर (आर्टिलरी सेंटर, हैदराबाद) मध्ये निवड मिळवून कुटुंबासह संपूर्ण परिसराचे नाव उज्ज्वल केले आहे.अत्यंत प्रतिकूल आर्थिक परिस्थितीत वाढलेल्या भावेशने लहानपणापासूनच कष्टाची तयारी ठेवली. शिक्षण घेत असतानाच तो गणपती ॲड एजन्सीमध्ये काम करून कुटुंबाला हातभार लावत होता. त्याने प्राथमिक व माध्यमिक शिक्षण जळगाव येथे पूर्ण केले असून सध्या बारावी (गणित शाखा) चे शिक्षण घेत आहे.
लहान वयातच वडिलांचे छत्र हरपल्यामुळे आलेल्या संकटांवर मात करत त्याने आई, आजी-आजोबा यांच्या कष्टांची जाणीव मनात ठेवून सैन्यात भरती होण्याचे स्वप्न जिद्दीने पूर्ण केले. नियमित सराव, शिस्तबद्ध जीवनशैली आणि अथक मेहनतीच्या जोरावर त्याने भारतीय सैन्यात स्थान मिळवले.भावेश १ जुलै रोजी प्रशिक्षणासाठी आर्टिलरी सेंटर, हैदराबाद येथे रवाना होणार आहे. त्याच्या या उल्लेखनीय यशाबद्दल रामेश्वर कॉलनीसह संपूर्ण जळगाव शहरातून त्याचे अभिनंदन होत असून त्याच्यावर कौतुकाचा वर्षाव केला जात आहे. भावेश हा गणपती ॲड एजन्सीचे मार्केटिंग प्रतिनिधी सागर पाटील यांचा लहान भाऊ असून त्याच्या यशामुळे पाटील कुटुंबात आनंदाचे वातावरण आहे.
