नवराज्य Live न्यूज नेटवर्क
जळगाव : गेल्या काही दिवसांपासून जळगावच्या राजकीय तसेच प्रशासकीय वर्तुळात सुरू असलेल्या चर्चांवर अखेर आज शिक्कामोर्तब झाले. राज्य शासनाने आयएएस अधिकाऱ्यांच्या बदल्यांचे आदेश जाहीर केले असून, जळगाव महानगरपालिकेचे आयुक्त ज्ञानेश्वर ढेरे यांची बदली करण्यात आली आहे. त्यांच्या जागी २०२१ बॅचचे आयएएस अधिकारी आदित्य जीवने यांची नवीन आयुक्त म्हणून नियुक्ती करण्यात आली आहे.
सध्या आदित्य जीवने हे छत्रपती संभाजीनगर येथे महावितरणमध्ये संयुक्त संचालक पदाची जबाबदारी सांभाळत आहेत. प्रशासनातील अभ्यासू, ऊर्जावान आणि आधुनिक कार्यपद्धती स्वीकारणारे अधिकारी अशी त्यांची ओळख आहे. त्यामुळे त्यांच्या नियुक्तीकडे जळगावकरांच्या अपेक्षेने पाहिले जात आहे.
दरम्यान, विद्यमान आयुक्त ज्ञानेश्वर ढेरे यांची पुढील नियुक्ती नेमकी कुठे करण्यात आली आहे, याबाबत अद्याप अधिकृत माहिती समोर आलेली नाही. शासनाच्या या अचानक निर्णयामुळे महापालिका प्रशासनात हालचालींना वेग आला असून, नव्या आयुक्तांच्या पदग्रहणाची तयारी सुरू झाली आहे.
शहरातील पाणीपुरवठा, रस्ते, स्वच्छता, अतिक्रमण आणि विकासकामांसारख्या महत्त्वाच्या प्रश्नांवर आदित्य जीवने कोणती भूमिका घेतात, याकडे आता संपूर्ण जळगावचे लक्ष लागले आहे.
