नवराज्य Live न्यूज नेटवर्क
जळगाव स्थानिक स्वराज्य संस्था मतदारसंघाच्या विधान परिषद निवडणुकीने आता जिल्ह्यातील राजकारण चांगलेच ढवळून निघाले आहे. महायुतीमध्ये ही जागा भाजपच्या वाट्याला गेल्यानंतर शिवसेना शिंदे गटातील असंतोष उघडपणे समोर आला असून, त्यातून निर्माण झालेल्या बंडखोरीमुळे निवडणुकीचे समीकरण अधिकच गुंतागुंतीचे बनले आहे. परिस्थिती नियंत्रणात आणण्यासाठी भाजपचे ज्येष्ठ नेते गिरीश महाजन यांनी प्रयत्न केले असले, तरी ते यशस्वी झाले नसल्याची चर्चा राजकीय वर्तुळात रंगली आहे.
महायुतीकडून भाजपने नंदकिशोर उर्फ नंदू महाजन यांना अधिकृत उमेदवारी दिल्यानंतर शिवसेना शिंदे गटात नाराजीची लाट उसळली. ही जागा शिवसेना गटाला मिळावी यासाठी पालकमंत्री गुलाबराव पाटील यांनी शेवटपर्यंत जोरदार प्रयत्न केल्याचे बोलले जात होते. त्यांच्या निकटवर्तीयांना उमेदवारी मिळण्याचीही चर्चा होती. मात्र अखेरीस भाजपच्या पारड्यात जागा गेल्यानंतर शिंदे गटातील अनेक कार्यकर्त्यांनी नाराजी व्यक्त केली.
या पार्श्वभूमीवर भाजप उमेदवाराच्या शक्तिप्रदर्शनात गुलाबराव पाटील आणि त्यांचे समर्थक अनुपस्थित राहिल्याने राजकीय चर्चांना आणखी उधाण आले. त्यानंतर महायुतीतील नाराजी कमी करण्यासाठी भाजप नेत्यांनी हालचाली सुरू केल्या. गिरीश महाजन यांनीही समेटासाठी पुढाकार घेतल्याची माहिती समोर आली. मात्र, परिस्थितीत फारसा बदल झालेला दिसून आला नाही.
माध्यमांशी संवाद साधताना गुलाबराव पाटील यांनीही अप्रत्यक्षपणे नाराजी व्यक्त केली. “प्रत्येकवेळी अपेक्षा फक्त आमच्याकडूनच ठेवता येणार नाहीत. जळगावमध्ये भाजपच्या जशा अपेक्षा आहेत, तशाच राज्यातील इतर भागात आमच्याही भावना आणि दावे आहेत,” अशा शब्दांत त्यांनी भूमिका स्पष्ट केली. तसेच बंडखोरी थांबवण्याची जबाबदारी दोन्ही बाजूंनी पार पाडली पाहिजे, असेही त्यांनी सूचित केले.
दरम्यान, महाविकास आघाडीतही या जागेसाठी मोठ्या प्रमाणात राजकीय घडामोडी घडल्या. अखेरीस ही जागा शिवसेना उद्धव बाळासाहेब ठाकरे गटाच्या वाट्याला गेली. राष्ट्रवादी काँग्रेस शरद पवार गटाकडून दावा करण्यात आला होता, मात्र तो मागे पडल्याचे चित्र पाहायला मिळाले. तरीदेखील महाविकास आघाडीने एकत्रितपणे निवडणूक लढवण्याचा निर्णय घेत आपली एकजूट दाखवण्याचा प्रयत्न केला आहे.
शिंदे गटातील बंडखोरांनी अर्ज कायम ठेवल्यास जळगावमधील ही निवडणूक चौरंगी होण्याची शक्यता निर्माण झाली आहे. भाजप, ठाकरे गट, अपक्ष आणि शिंदे गटाशी संबंधित बंडखोर असे विविध उमेदवार मैदानात असल्याने निवडणूक अत्यंत रंगतदार होणार असल्याचे संकेत मिळत आहेत.
स्थानिक स्वराज्य संस्थांमधील मतदारांवर मजबूत प्रभाव असलेल्या नेत्यांच्या हालचालींमुळे ही निवडणूक अधिकच प्रतिष्ठेची बनली आहे. विशेषतः शिंदे गटातील नाराजी भाजप उमेदवारासाठी अडचणीची ठरू शकते, अशी चर्चा राजकीय विश्लेषकांकडून केली जात आहे. त्यामुळे आगामी काही दिवसांत वरिष्ठ पातळीवरून नेमक्या कोणत्या घडामोडी घडतात, याकडे आता संपूर्ण जिल्ह्याचे लक्ष लागले आहे.
निवडणुकीच्या रिंगणातील उमेदवार
– नंदू महाजन – भाजप
– शरद तायडे – शिवसेना ठाकरे गट
– अनिल चौधरी – अपक्ष
– रेश्मा काळे – शिंदे गटाशी संबंधित बंडखोर उमेदवार
