नवराज्य Live न्यूज नेटवर्क
जळगाव : फरार व पाहिजे आरोपींचा शोध घेणे तसेच अवैध शस्त्रनिर्मिती व शस्त्रतस्करीवर प्रभावी आळा घालण्याच्या उद्देशाने जळगाव, धुळे व नाशिक ग्रामीण पोलिसांनी संयुक्तपणे मध्यप्रदेशातील बडवानी जिल्ह्यातील पार उमरटी (ता. वरला) येथे आंतरराज्यीय ‘ऑपरेशन कॉम्बिंग’ यशस्वीरीत्या राबवले. या कारवाईमुळे अवैध शस्त्रनिर्मिती व तस्करीच्या जाळ्यावर मोठा आघात करण्यात आला आहे.
चोपडा शहर, चोपडा ग्रामीण आणि नाशिक ग्रामीणमधील पवारवाडी पोलीस ठाण्यात दाखल असलेल्या गंभीर गुन्ह्यांतील फरार व संशयित आरोपींच्या शोधासाठी २१ जुलै रोजी मध्यरात्री पथके रवाना झाली.
विशेष मोहिमेचे नेतृत्व अपर पोलीस अधीक्षक अशोक नखाते यांनी केले.
पहाटे १ ते सकाळी ८ या वेळेत पार उमरटी परिसरात व्यापक शोधमोहीम राबविण्यात आली. या विशेष मोहिमेचे नेतृत्व अपर पोलीस अधीक्षक अशोक नखाते यांनी केले. मोहिमेत जळगाव, धुळे व नाशिक ग्रामीण पोलीस दलातील विविध अधिकारी, स्थानिक गुन्हे शाखा, विशेष शाखा तसेच ४०० हून अधिक पोलीस अधिकारी-कर्मचारी आणि २० शासकीय वाहनांचा ताफा सहभागी झाला होता.
कारवाईदरम्यान ४५ संशयित घरांची झडती, २० व्यक्तींची सखोल चौकशी आणि १२ संशयितांना ताब्यात घेण्यात आले. चोपडा ग्रामीण पोलीस ठाण्याच्या गुन्ह्याच्या अनुषंगाने २ देशी कट्टे आणि ४ जिवंत काडतुसे जप्त करण्यात आली. तसेच ३२ संशयित महाराष्ट्र पासिंग मोटारसायकली, देशी कट्टे तयार करण्यासाठी वापरले जाणारे मोठ्या प्रमाणातील कच्चा माल, साचे आणि इतर साहित्यही जप्त करण्यात आले.
याशिवाय आधुनिक तंत्रज्ञानाच्या सहाय्याने २७ फरार व संशयित आरोपींच्या घरांचे जिओ-टॅगिंग करण्यात आले असून, पुढील तपासासाठी ही माहिती महत्त्वाची ठरणार असल्याचे पोलिसांनी सांगितले आहे.
जळगाव, धुळे व नाशिक ग्रामीण पोलिसांच्या समन्वयातून झालेल्या या कारवाईमुळे अवैध शस्त्रनिर्मिती व तस्करीच्या जाळ्यावर मोठा आघात झाला असून संघटित गुन्हेगारीवर नियंत्रण मिळविण्यासाठी ही मोहीम अत्यंत महत्त्वाची ठरत आहे. दरम्यान, जिल्ह्यात अवैध शस्त्रास्त्रे, संघटित गुन्हेगारी आणि फरार आरोपींविरुद्ध कठोर कारवाई सातत्याने सुरू राहणार असल्याचे सांगत, नागरिकांनीही संशयास्पद हालचाली किंवा बेकायदेशीर कृत्यांची माहिती तात्काळ पोलिसांना द्यावी, असे आवाहन पोलीस अधीक्षक श्रीकांत धिवरे यांनी केले आहे.
