नवराज्य Live डिजिटल न्यूज नेटवर्क
जळगाव – समाज बदलवण्यासाठी बाईट नव्हे, तर क्रांतिकारी विचारांची आवश्यकता आहे. डॉ. बाबासाहेब आंबेडकरांनी घडवलेले क्रांतिकारी संविधान आज धोक्यात आले आहे. मानवी हक्कांवर गदा आणण्याचे प्रयत्न सुरू असून अशा परिस्थितीत सामान्य जनतेने उठाव करणे अत्यावश्यक आहे, असे प्रतिपादन राज्यस्तरीय संविधान सन्मान संमेलनाचे संमेलनाध्यक्ष उत्तम कांबळे यांनी केले.
विचारमंचावर व्यंगकवी संपत सरल, न्यायमूर्ती (नि.) बी. जे. कोळसे पाटील, श्रीधर अंभोरे, निरज जैन, माजी आमदार शिरीष चौधरी, उद्योजक संजय इंगळे, अॅड. राजेश झाल्टे, गौतम खंडारे, शालिग्राम गायकवाड, खलील देशमुख, वासंती दिघे, मुख्य संयोजक मुकुंद सपकाळे, स्वागताध्यक्ष डॉ. करीम सालार, भारती रंधे, जयसिंग वाघ, डॉ. मिलिंद बागूल, डॉ. सत्यजित साळवे आदी मान्यवर उपस्थित होते.
. सत्ताधाऱ्यांकडून संविधानाच्या मूल्यांना तडा देण्याचे प्रयत्न होत असून, संविधानाची पूजा करणारे ‘भक्त’ तयार करण्यामागे त्यांचे राजकीय हेतू असल्याची टीकाही त्यांनी केली.यावेळी शहरातील नागरिकांनी कार्यक्रमास मोठ्या प्रमाणात हजेरी लावली.
कार्यक्रमाची सुरुवात घटनाकार डॉ. बाबासाहेब आंबेडकर यांच्या प्रतिमेचे पूजन आणि संविधान गीताने झाली. डॉ. मिलिंद बागूल यांनी राज्यस्तरीय संविधान सन्मान संमेलन घेण्यामागील भूमिका स्पष्ट केली. डॉ. करीम सालार यांनी संविधान रक्षणाच्या लढाईत जळगावकर अग्रस्थानी आहेत असा अभिमान व्यक्त केला. मुख्य संयोजक मुकुंद सपकाळे यांनी संविधानाचा होणारा अपमान रोखण्यासाठीच हे संमेलन आयोजित करण्यात आल्याचे सांगितले.
संमेलनात संविधान सन्मान पुरस्कार प्रदान
यावेळी ‘आम्ही भारताचे लोक’ या स्मरणिकेचे प्रकाशन झाले. संमेलनात राज्यस्तरीय संविधान सन्मान पुरस्कार डॉ. श्रीराम सोनवणे, प्रा. अशोक पवार, कांता रमेश अहिरे, शीला मुरलीधर पवार यांना प्रदान करण्यात आला. तर ‘परिवर्तन साहित्य आणि समीक्षा’ व ‘परिवर्तन समीक्षा आणि विचार’ डॉ. मिलिंद बागूल, ‘खिचडी’ अ. फ. भालेराव, ‘गुरु गौरव’ डॉ. मारूती कसाब यांच्या पुस्तकांचे प्रकाशन झाले. सूत्रसंचालन बापूराव पानपाटील तर आभार डॉ. सत्यजित साळवे यांनी मानले. यशस्वीतेसाठी चेतन ननवरे, महेंद्र केदार, अनिल सुरडकर, बापू शिरसाठ, सुभाष सपकाळे, चंद्रशेखर अहिरराव, साहेबराव बागुल, दत्तू सोनवणे, गौतम खंडारे, शालिक गायकवाड, वासंती दिघे, खलील देशमुख आदींनी परिश्रम घेतले.
संविधानासाठी लढाई लढा
माजी न्यायमूर्ती बी. जे. कोळसे पाटील यांनी संविधान अबाधित ठेवण्यासाठी प्रत्येकाने रस्त्यावर येऊन अस्तित्वाची लढाई लढली पाहिजे. असे सांगितले. तर संपत सरल यांनी संविधान व आरक्षण चळवळ सोशल मीडियावरून लढता येणार नाही. जमिनीवरची रस्त्यावरची लढाई हवी. प्रत्येक भारतीयाची जबाबदारी आहे की सत्ताधाऱ्यांकडून संविधानाची अंमलबजावणी योग्य व्हावी. त्यांनी आपल्या व्यंग कवितांमधून सध्याच्या संविधानविरोधी वातावरणावर परखड टीका केली.
