नवराज्य Live डिजिटल न्यूज नेटवर्क
जळगाव – खासगी प्रवाशांच्या सुरक्षिततेची व सोयीची पर्वा न करता त्यांना रस्त्यावर सोडल्याचा संतापजनक प्रकार ‘संगीतम ट्रॅव्हल्स’कडून घडला आहे. पुणे–जळगाव मार्गावर गुरुवारी रात्री ट्रॅव्हल्सची बस (MH 19 CX 8884) शिरूर बायपास परिसरात अचानक बंद पडली. डिझेल पाइप खराब झाल्यामुळे बस रस्त्याच्या कडेला तासन्तास उभी राहिली. मात्र कंपनीने ३१ प्रवाशांसाठी कोणतीही पर्यायी व्यवस्था न करता त्यांना अडचणीत ठेवले.
पुणे पोलिसांची खाकीतली माणुसकी……
प्रवाशांनी पर्यायी वाहनाची मागणी केली असता चालक व मालकाकडून कोणताही प्रतिसाद न मिळाल्याने प्रवासी संतप्त झाले. अखेर कोणताही मार्ग न दिसल्याने प्रवाशांनी पोलिसांशी संपर्क साधला. पोलिसांनी गंभीरतेचा विचार करून दोन टेम्पो ट्रॅव्हलर्सची व्यवस्था केली. शुक्रवारी पहाटे ४ वाजता दोन्ही वाहने प्रवाशांना घेऊन जळगावकडे रवाना झाली.
ट्रॅव्हल्स कार्यालयात गोंधळ…..
दुपारी १२ वाजता सर्व प्रवासी या टेम्पो ट्रॅव्हलर्सने थेट जळगावातील स्टेडियम चौकातील संगीतम ट्रॅव्हल्स कार्यालयात पोहोचले. त्यांनी तिकिटांचे पैसे परत देण्याची मागणी केली. मात्र कर्मचाऱ्यांनी सुरुवातीस पैसे देण्यास नकार दिला.
मालकाकडून प्रतिसाद न मिळाल्याने “तुम्ही तक्रार करा” असे उत्तर देण्यात आले. यामुळे प्रवासी अधिक आक्रमक झाले. जवळपास तासभर गोंधळ झाल्यानंतर अखेर टेम्पो ट्रॅव्हलर्सचे ४२ हजारांचे बिल भरण्यास कंपनीने होकार दिल्यावर परिस्थिती शांत झाली.
