नवराज्य Live न्यूज नेटवर्क
जळगाव : श्री पंतावधूत मठी अवधूत भजन मंडळ, जळगाव यांच्या वतीने बुधवार, दि. २९ जुलै २०२६ रोजी गुरुपौर्णिमा उत्सवाचे आयोजन करण्यात आले आहे. दरवर्षीप्रमाणे यंदाही विविध धार्मिक, आध्यात्मिक व सामाजिक उपक्रमांनी हा उत्सव साजरा केला जाणार असून, भाविकांनी मोठ्या संख्येने उपस्थित राहून कार्यक्रमाचा लाभ घ्यावा, असे आवाहन आयोजकांनी केले आहे.
उत्सवाची सुरुवात सकाळी ७ वाजता नित्यसेवेने होईल. त्यानंतर पादुका अभिषेक पूजन, नामस्मरण, मौन नामस्मरण, भजनसेवा, अल्पोपहार, श्रीपंत बोधपीठ व बोधसत्र, महाआरती, पुष्पांजली आणि धावा असे विविध धार्मिक कार्यक्रम पार पडतील.
याच दिवशी सकाळी १२.३० ते १.१५ या वेळेत मनपा शाळा क्रमांक ३ च्या आवारात वृक्षारोपण कार्यक्रम आयोजित करण्यात आला आहे. तसेच दुपारी ४.३० वाजता स्वातंत्र्य चौक येथील मुलांचे निरीक्षणगृह व बालगृहातील मुलांना कपडे वाटपाचा सामाजिक उपक्रम राबविण्यात येणार आहे.
वृक्षारोपण कार्यक्रमासाठी महापौर दिपमाला काळे, नगरसेविका मंगला चौधरी, डॉ. निलेश चांडक, नगरसेविका विद्याताई सोनवणे, नगरसेवक पियुष कोल्हे आणि नगरसेवक कल्पेश सोनवणे यांची प्रमुख उपस्थिती राहणार आहे.
कार्यक्रमाचे स्थळ श्री पंत मंदिर, मनपा शाळा क्र. ३, पांजरापोळ पाण्याच्या टाकीजवळ, जळगाव असे असून, सर्व भाविकांनी उपस्थित राहून गुरुपौर्णिमा उत्सवाचा लाभ घ्यावा, असे आवाहन श्री पंतावधूत मठी , अवधूत भजन मंडळ, जळगाव यांच्या वतीने करण्यात आले आहे.
