नवराज्य Live न्यूज नेटवर्क
शिरसोली प्र. बो. (ता. जळगाव) : गावात कायदा व सुव्यवस्था अधिक प्रभावीपणे राखण्यासाठी शिरसोली प्र. बो. ग्रामपंचायतीने महत्त्वपूर्ण पुढाकार घेत नवीन पोलीस मदत केंद्र सुरू केले आहे. ग्रामपंचायतीतर्फे एमआयडीसी अंतर्गत बाजारपट्टा परिसरात पोलीस मदत केंद्रासाठी स्वतंत्र खोली उपलब्ध करून देण्यात आली आहे.
यासोबतच ग्रामपंचायतीने बाजारपट्टा परिसर, जळगाव–पाचोरा महामार्ग तसेच गावातील मुख्य रस्त्यांवर बसविण्यात आलेले सीसीटीव्ही कॅमेरे नव्याने सुरू झालेल्या पोलीस मदत केंद्राशी जोडले आहेत. त्यामुळे परिसरातील हालचालींवर अधिक प्रभावीपणे लक्ष ठेवणे शक्य होणार असून, गुन्हे प्रतिबंध, वाहतूक नियंत्रण आणि नागरिकांच्या सुरक्षिततेला बळकटी मिळणार आहे.
नूतन पोलीस मदत केंद्राची पाहणी करण्यासाठी जळगावचे मा. उपविभागीय पोलीस अधिकारी (DySP), एमआयडीसी जळगाव पोलीस ठाण्याचे पोलीस निरीक्षक (PI), शिरसोली बिटचे हवालदार तसेच गोपनीय शाखेचे पोलीस कर्मचारी उपस्थित होते.
यावेळी ग्रामपंचायतीचे सरपंच, उपसरपंच, सदस्य, ग्रामपंचायत कर्मचारी, सामाजिक कार्यकर्ते आणि ग्रामस्थ मोठ्या संख्येने उपस्थित होते. ग्रामपंचायतीच्या या उपक्रमामुळे गावातील सुरक्षा व्यवस्था अधिक सक्षम होण्यास मदत होणार असल्याची भावना उपस्थितांनी व्यक्त केली.
