नवराज्य Live न्यूज नेटवर्क
जळगाव : जळगाव महानगरपालिकेच्या मालकीच्या सागर पार्क मैदानावर क्रिकेट स्पर्धांना बंदी घालण्याच्या प्रस्तावाला शहरातील क्रिकेटप्रेमी व माजी नगरसेवकांनी तीव्र विरोध दर्शविला आहे. येत्या १४ मे रोजी होणाऱ्या मनपा महासभेत हा प्रस्ताव मंजुरीसाठी येणार असल्याची माहिती समोर आल्यानंतर संबंधितांनी निवेदनाद्वारे नाराजी व्यक्त केली आहे.
निवेदनात म्हटले आहे की, सागर पार्क हे शहरातील मनपाच्या मालकीचे एकमेव मोठे मैदान असून गेल्या अनेक वर्षांपासून येथे विविध समाज व संघटनांकडून डे-नाईट क्रिकेट स्पर्धांचे आयोजन केले जाते. या स्पर्धांमुळे युवकांना खेळासाठी व्यासपीठ मिळत असून सामाजिक ऐक्य व बंधुभाव वाढीस लागतो.
ध्वनीप्रदूषण व स्वच्छतेबाबत तक्रारी असल्यास ध्वनीक्षेपकाचा आवाज कमी करणे, सामने रात्री ९ वाजेपर्यंत मर्यादित ठेवणे तसेच मैदान परिसराची नियमित साफसफाई करण्यास आयोजक तयार असल्याचे निवेदनात नमूद करण्यात आले आहे. त्यामुळे क्रिकेट स्पर्धांवर थेट बंदी न घालता अटी-शर्तींसह परवानगी कायम ठेवावी, अशी मागणी करण्यात आली आहे.
दरम्यान, पूर्वी मैदानावर व्यावसायिक प्रकल्प उभारण्याचा प्रयत्न झाला होता. आता क्रीडा उपक्रम बंद करून मैदान हडपण्याचा प्रयत्न होत असल्याची शंका देखील निवेदनातून व्यक्त करण्यात आली आहे.
सदर मागणी माजी नगरसेवक अशोक लाडवंजारी, सुनील भैय्या माळी, राजुभाऊ मोरे, किरण राजपूत, रिंकू चौधरी, सुहास चौधरी व नईम खाटीक यांनी केली आहे.
