नवराज्य Live न्यूज नेटवर्क
जळगाव : पंचायत समिती जळगाव अंतर्गत ग्रामीण गृहनिर्माण विभागातील घरकुल कामांमध्ये हलगर्जीपणा व असमाधानकारक कारभार केल्याप्रकरणी दोन ग्रामीण गृहनिर्माण अभियंत्यांना कार्यमुक्त करण्यात आले आहे. याबाबत गटविकास अधिकारी चंद्रकांत बोदरे यांनी आदेश जारी केले आहेत.
प्राप्त आदेशानुसार, योगेश जनार्दन सपकाळे व योगेश राजेंद्र पाटील या दोन्ही अभियंत्यांकडे सोपविण्यात आलेल्या ग्रामपंचायतींमधील घरकुल योजनांची कामे समाधानकारक नसल्याचे निदर्शनास आले होते. यासंदर्भात संबंधितांना वारंवार सूचना देण्यात आल्या होत्या. मात्र, त्यानंतरही कामकाजात अपेक्षित सुधारणा न झाल्याने घरकुल योजनांच्या अंमलबजावणीवर विपरीत परिणाम होत असल्याचे आदेशात नमूद करण्यात आले आहे.
यामुळे दोन्ही अभियंत्यांना २८ एप्रिल २०२६ रोजी मध्यांतरानंतर ग्रामीण गृहनिर्माण अभियंता पदावरून कार्यमुक्त करण्यात आले आहे. तसेच, त्यांच्याकडील ग्रामपंचायतींचा कार्यभार इतर अभियंत्यांकडे सोपविण्याचे आदेश देण्यात आले आहेत.
यानुसार योगेश सपकाळे यांच्याकडील कार्यभार ग्रामीण गृहनिर्माण अभियंता मनोज राजेंद्र बोर्से यांच्याकडे, तर योगेश पाटील यांच्याकडील कार्यभार धनंजय संतोष वाणी यांच्याकडे सोपविण्यात आला आहे. संबंधितांनी तात्काळ कार्यभार हस्तांतरित करून अहवाल सादर करण्याच्या सूचनाही आदेशात देण्यात आल्या आहेत.
