नवराज्य Live न्यूज नेटवर्क
जळगाव : सार्वजनिक बांधकाम विभागातील भ्रष्टाचार पुन्हा एकदा समोर आला असून, मक्तेदाराचे थकीत बिल मंजूर करून देण्यासाठी लाखोंची लाच मागणाऱ्या शाखा अभियंत्याला लाचलुचपत प्रतिबंधक विभागाने रंगेहाथ पकडले. योगेश अहिरे असे अटक करण्यात आलेल्या शाखा अभियंत्याचे नाव असून, १५ लाख रुपयांच्या मागणीपैकी पहिला हप्ता म्हणून ५ लाख रुपये स्वीकारताना एसीबीच्या पथकाने ही धडक कारवाई केली.
माहितीनुसार, तक्रारदार मक्तेदाराने सार्वजनिक बांधकाम विभागामार्फत पूर्ण केलेल्या कामाचे बिल मंजुरीसाठी सादर केले होते. मात्र, संबंधित बिल मंजूर करण्यासाठी शाखा अभियंता योगेश अहिरे यांनी तब्बल १५ लाख रुपयांची मागणी केल्याचा आरोप आहे. लाचेची रक्कम देण्यास नकार देत मक्तेदाराने नाशिक येथील लाचलुचपत प्रतिबंधक विभागाकडे तक्रार दाखल केली.
तक्रारीनंतर एसीबीच्या अधिकाऱ्यांनी पडताळणी केली असता लाचेची मागणी झाल्याचे स्पष्ट झाले. त्यानुसार शनिवारी सार्वजनिक बांधकाम विभागाच्या कार्यालय परिसरात सापळा रचण्यात आला. तडजोडीनंतर ठरलेली ५ लाख रुपयांची रक्कम स्वीकारताना योगेश अहिरे यांना एसीबीच्या पथकाने रंगेहाथ अटक केली.
या कारवाईमुळे सार्वजनिक बांधकाम विभागात एकच खळबळ उडाली असून, अधिकारी व कर्मचाऱ्यांमध्ये भीतीचे वातावरण निर्माण झाले आहे. शहरातही या घटनेची जोरदार चर्चा सुरू असून, भ्रष्टाचाराविरोधात एसीबीने उचललेल्या कठोर पावलाचे नागरिकांकडून स्वागत होत आहे.
दरम्यान, या प्रकरणात आणखी कोणाचा सहभाग आहे का, लाचेच्या व्यवहारामागे मोठे रॅकेट कार्यरत होते का, याचा तपास एसीबीकडून सुरू करण्यात आला आहे. संबंधित अधिकाऱ्याच्या आर्थिक व्यवहारांसह संपत्तीचीही चौकशी होण्याची शक्यता व्यक्त केली जात आहे.
