नवराज्य Live न्यूज नेटवर्क
जळगाव, (वा.) महायुतीच्या उमेदवारांच्या प्रचारार्थ शिवसेना मुख्य नेते व महाराष्ट्र राज्याचे उपमुख्यमंत्री एकनाथ शिंदे यांच्या रोड शोचे आयोजन आज शहरात करण्यात आले आहे. हा रोड शो दुपारी १ वाजता छत्रपती शिवाजी महाराज यांच्या पुतळ्यापासून सुरू होणार आहे.
या रोड शोमध्ये पालकमंत्री गुलाबराव पाटील, मंत्री गिरीश महाजन, केंद्रीय राज्य मंत्री रक्षा खडसे, मंत्री संजय सावकारे, खासदार स्मिता वाघ, आमदार अनिल पाटील, माजी मंत्री गुलाबराव देवकर यांच्यासह आमदार राजुमामा भोळे, आमदार मंगेश चव्हाण, आमदार प्रा. चंद्रकांत सोनवणे, आमदार किशोर पाटील, आमदार अमोल जावळे, आमदार चंद्रकांत पाटील व आमदार अमोल पाटील यांची प्रमुख उपस्थिती राहणार आहे.
रोड शोचा मार्ग छत्रपती शिवाजी महाराज पुतळा येथून सुरू होऊन चित्रा चौक, भंगाळे गोल्ड चौक, सुभाषचंद्र बोस चौक, आसोदा रोड, शास्त्री टॉवर चौक, पंडित नेहरू चौक मार्गे रेल्वे स्टेशनजवळील डॉ. बाबासाहेब आंबेडकर यांच्या पुतळ्याजवळ समारोप होणार आहे.
या रोड शोसाठी शिवसेना, भारतीय जनता पार्टी, राष्ट्रवादी काँग्रेस पार्टी तसेच आर.पी.आय. (आठवले गट) यांच्या वतीने जोरदार तयारी करण्यात आली असून, जळगाव जिल्ह्यातील नागरिकांनी हजारोंच्या संख्येने उपस्थित राहावे, असे आवाहन आयोजकांच्या वतीने करण्यात आले आहे. हा रोड शो महायुतीच्या प्रचाराला मोठी दिशा देणारा ठरणार असून, जळगाव शहरात उत्साहाचे वातावरण निर्माण झाले आहे.
