जळगाव | 3 डिसेंबर 2025
जागतिक दिव्यांग दिनानिमित्त दीपस्तंभ मनोबल प्रकल्पात तीन दिवसीय शैक्षणिक, जनजागृती आणि सांस्कृतिक उपक्रमांचे आयोजन करण्यात आले. समावेशक शिक्षण, संवेदनशीलता आणि सामाजिक सहभाग वाढविण्याच्या उद्देशाने राबविण्यात आलेल्या या कार्यक्रमांत शैक्षणिक संस्था, स्क्राईब्स (लेखनिक), स्वयंसेवक आणि नागरिकांचा व्यापक सहभाग मिळाला.
एम. जे. कॉलेज, नोबल क्लासेस, गोदावरी मेडिकल कॉलेज आणि संकल्प क्लासेसच्या विद्यार्थ्यांनी कॅम्पसला भेट देत प्रशिक्षण प्रक्रिया, सहाय्यक तंत्रज्ञान व कौशल्यविकास उपक्रमांची माहिती घेतली. शकुंतला हायस्कूल, बहिणाबाई माध्यमिक विद्यालय आणि गोदावरी इंजिनीरिंग कॉलेज येथे आयोजित जागरूकता व डेमो सत्रांत दिव्यांग व्यक्तींच्या क्षमतांबद्दल आणि समावेशक समाजनिर्मितीच्या गरजेबद्दल मार्गदर्शन करण्यात आले.
तसेच गोविंदा कोळी सरांच्या माध्यमातून उपस्थित 20 स्क्राईब्सचा सन्मान करून प्रमाणपत्रे प्रदान करण्यात आली; हर्षदीप घुगे सरांनी स्क्राईब्स(लेखनिक) व विद्यार्थ्यांसाठी प्रेरणादायी संवाद सत्र घेतले. समाजातील विविध घटकांनी उत्साहाने सहभाग नोंदवत आयोजित रक्तदान शिबिरात एकूण 41 रक्तदात्यांनी रक्तदान केले.
उपक्रमांचा समारोप दिव्यांग विद्यार्थ्यांच्या “दिव्य पहाट” या सांस्कृतिक सादरीकरणाने झाला, ज्यामध्ये विद्यार्थ्यांनी भूपाळी, भजन आणि भक्तिगीते सादर करत आपल्या कलात्मकतेची व आत्मविश्वासाची झलक दाखवली; Disability प्रतीकांवर आधारित रंगोळीने क्षमतेकडे पाहण्याचा सकारात्मक संदेश दिला. कार्यक्रमात मारोती पोटे सर व मुकुंद गोसावी यांनी मानसिक सामर्थ्य, स्वावलंबन आणि समाजाने दिव्यांग व्यक्तींना स्वीकार देण्याच्या गरजेबाबत मार्गदर्शन केले.
या तीन दिवसीय उपक्रमांमधून दिव्यांग विद्यार्थी, स्वयंसेवक आणि युवक यांच्या सहभागाने समावेशक शिक्षणाची मूल्ये अधिक दृढ झाली. दीपस्तंभ मनोबलच्या मते, दिव्यांग व्यक्तींच्या क्षमतांचा सन्मान आणि समान संधींचे वातावरण निर्माण करणे ही सामूहिक सामाजिक जबाबदारी असून, या उपक्रमांनी त्या दिशेने अर्थपूर्ण पाऊल टाकले आहे.
