नवराज्य Live न्यूज नेटवर्क
जळगाव : जळगाव शहरातील घरफोडीच्या गुन्ह्याचा तपास करून एमआयडीसी पोलिसांनी उल्लेखनीय कामगिरी केली आहे. घरफोडीच्या गुन्ह्यात चोरीला गेलेले तब्बल ३२ लाख १८ हजार ८०० रुपये किमतीचे सोन्या-चांदीचे दागिने आणि रोख रक्कम हस्तगत करण्यात आली होती. न्यायालयाच्या आदेशानंतर हा मुद्देमाल फिर्यादी महिला संगीता राजू धुये यांना परत करण्यात आला आहे.
जळगाव शहरातील एमआयडीसी पोलीस ठाण्याच्या हद्दीतील महानगर परिसर, रामेश्वर कॉलनी आणि जळगाव येथील रहिवासी संगीता राजू धुये यांच्या बंद घराचे कडी-कोयंडे तोडून अज्ञात चोरट्यांनी घरातील सोन्या-चांदीचे दागिने आणि रोख रक्कम चोरून नेली होती. या प्रकरणी एमआयडीसी पोलीस ठाण्यात भारतीय न्याय संहिता (BNS), २०२३ मधील कलम ३०५(अ), ३३१(३) व ३३१(४) अन्वये गुन्हा दाखल करण्यात आला होता.
या गुन्ह्याचा एमआयडीसी पोलिसांनी सखोल तपास करून आरोपींना अटक केली आणि त्यांच्याकडून चोरीस गेलेला मुद्देमाल हस्तगत केला. त्यानंतर जप्त केलेला मुद्देमाल परत मिळवण्यासाठी फिर्यादी महिलेने जळगाव न्यायालयात अर्ज दाखल केला होता.
न्यायालयाने ८ ऑक्टोबर २०२६ रोजी मुद्देमाल परत करण्याचे आदेश दिले. त्यानुसार एमआयडीसी पोलीस ठाण्यात पंचांसमक्ष कायदेशीर प्रक्रिया पूर्ण करून एकूण ३२ लाख १८ हजार ८०० रुपये किमतीचे सोन्या-चांदीचे दागिने तसेच रोख रक्कम फिर्यादी संगीता राजू धुये यांना सुपूर्द करण्यात आली.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गापाणे यांच्या मार्गदर्शनाखाली करण्यात आली. एमआयडीसी पोलीस ठाण्याचे वरिष्ठ पोलीस निरीक्षक बाबन आव्हाड तसेच तपास पथकातील अधिकारी आणि अंमलदार यांनी या कारवाईत महत्त्वाची भूमिका बजावली.
घरफोडीच्या गुन्ह्याचा तपास करून चोरीचा मुद्देमाल हस्तगत करणे आणि न्यायालयीन प्रक्रियेद्वारे तो मूळ मालकाला परत मिळवून देणे, ही एमआयडीसी पोलिसांची उल्लेखनीय कामगिरी ठरली आहे.
