नवराज्य Live न्यूज नेटवर्क
जळगाव : जळगाव जिल्ह्यातील दोन गुन्ह्यांमध्ये जप्त करण्यात आलेले सुमारे ६६ कोटी ७० लाख रुपये किमतीचे अंमली पदार्थ नियमानुसार नष्ट करण्यात आले. यात एकूण ४६.१५४ ग्रॅम वजनाचे अंम्फेटामाइन आणि मेथाक्वालोन या अंमली पदार्थांचा समावेश होता.
पोलीस अधीक्षक श्रीकांत धिवरे, अपर पोलीस अधीक्षक संदीप गावित तसेच अपर पोलीस अधीक्षक चाळीसगाव अशोक नखाते यांच्या मार्गदर्शनाखाली ही कारवाई करण्यात आली.
सर्वोच्च न्यायालयाचे निर्देश, केंद्र सरकारचे नियम तसेच महाराष्ट्र पोलीस महासंचालक आणि अंमली पदार्थ विरोधी कृती दलाच्या सूचनांनुसार जप्त अंमली पदार्थांचा नाश करण्याची प्रक्रिया राबविण्यात आली.
दि. ९ ऑक्टोबर २०२६ रोजी जिल्हापेठ पोलीस ठाण्याच्या स्टोअर रूममधून पंचांसमक्ष आणि वजन-मापे निरीक्षक गौतम उत्तम बावस्कर यांच्या उपस्थितीत जप्त अंमली पदार्थ सीलबंद अवस्थेत बाहेर काढण्यात आले. त्यानंतर जळगाव पोलीस मुख्यालयातून सशस्त्र पोलीस बंदोबस्तात हा मुद्देमाल पुणे जिल्ह्यातील रांजणगाव एमआयडीसी येथे नेण्यात आला.
तेथे M/s Maharashtra Enviro Power Ltd. या कंपनीच्या ठिकाणी जिल्हास्तरीय अंमली पदार्थ मुद्देमाल नाश समितीच्या मान्यतेनुसार अंमली पदार्थ नष्ट करण्यात आले. या संपूर्ण प्रक्रियेचे व्हिडिओ चित्रीकरणही करण्यात आले.
या कारवाईच्या वेळी स्थानिक गुन्हे शाखेचे पोलीस निरीक्षक राहुल गायकवाड, पोलीस उपनिरीक्षक सोपान गोर, पोलीस हेड कॉन्स्टेबल संदीप पाटील, राहुल बैसाणे, सागर पाटील, उमाकांत पाटील तसेच पोलीस कर्मचारी उपस्थित होते.
जप्त अंमली पदार्थांचा नियमानुसार नाश करून पोलिसांनी अंमली पदार्थविरोधी कारवाईतील महत्त्वाची प्रक्रिया पूर्ण केली.
