नवराज्य Live न्यूज नेटवर्क
जळगाव : माजी मंत्री तथा विद्यमान विधानपरिषद आमदार एकनाथराव खडसे यांच्या मुक्ताईनगर येथील फार्महाऊसची ड्रोनद्वारे रेकी करण्यात आल्याच्या कथित प्रकाराची सखोल चौकशी करून संबंधितांवर कठोर कारवाई करावी, तसेच खडसे कुटुंबीयांना अतिरिक्त सुरक्षा प्रदान करावी, अशी मागणी राष्ट्रवादी काँग्रेस पार्टी (शरदचंद्र पवार)च्या वतीने करण्यात आली.
याबाबत पक्षाच्या पदाधिकाऱ्यांनी सोमवार, ५ ऑक्टोबर २०२६ रोजी जिल्हाधिकारी तसेच जिल्हा पोलीस अधीक्षक यांना निवेदन सादर केले.
निवेदनात नमूद केल्यानुसार, २८ सप्टेंबर २०२६ रोजी रात्री मुक्ताईनगर येथील आमदार एकनाथराव खडसे यांच्या फार्महाऊस परिसरात ड्रोनद्वारे निगराणी करण्यात आल्याचा प्रकार समोर आला. फार्महाऊसवरील सुरक्षारक्षकांनी ड्रोनचे व्हिडिओ चित्रीकरण आपल्या मोबाईलमध्ये केल्याचेही निवेदनात म्हटले आहे. या प्रकरणी आमदार खडसे यांनी पोलीस महासंचालकांकडे तक्रार केल्याचेही सांगण्यात आले.
या घटनेची तातडीने आणि सखोल चौकशी करून ड्रोनद्वारे निगराणी करणाऱ्या व्यक्तींचा शोध घेऊन त्यांच्यावर कायदेशीर कारवाई करावी, तसेच संपूर्ण खडसे कुटुंबीयांच्या सुरक्षेचा आढावा घेऊन अतिरिक्त सुरक्षा व्यवस्था उपलब्ध करून द्यावी, अशी मागणी राष्ट्रवादी काँग्रेस (शरदचंद्र पवार)च्या पदाधिकाऱ्यांनी केली.
दरम्यान, या प्रकरणाची लवकरात लवकर चौकशी करून संबंधित आरोपींना अटक करण्यात यावी. तसेच मागण्यांची तातडीने दखल न घेतल्यास आगामी काळात तीव्र स्वरूपाचे आंदोलन करण्यात येईल, असा इशाराही पक्षाच्या वतीने देण्यात आला.
यावेळी जिल्हाध्यक्ष प्रमोदबापू पाटील, महानगर जिल्हाध्यक्ष अशोक लाडवंजारी, कार्याध्यक्ष राजुभाऊ मोरे, डॉ. संग्रामसिंग सूर्यवंशी, जिल्हा कार्यालय सरचिटणीस वाय. एस. महाजन, महानगर जिल्हा सरचिटणीस सुनील माळी, अल्पसंख्याक आघाडीचे जिल्हाध्यक्ष मजहरभाई पठाण, सामाजिक न्याय विभागाचे अध्यक्ष रमेश बारे, युवक महानगर जिल्हाध्यक्ष विनायक पाटील, विद्यार्थी आघाडीचे जिल्हाध्यक्ष गौरव वाणी, महानगर अध्यक्ष गिरीश सांगळे, जिल्हा उपाध्यक्ष किरणभाऊ राजपूत, गणेशभाऊ पाटील, नईम खाटीक, रफीक पटेल आदी पदाधिकारी उपस्थित होते.
