नवराज्य Live न्यूज नेटवर्क
जळगाव : राज्याच्या गृह विभागाने पोलीस प्रशासनात व्यापक फेरबदल करत जळगाव जिल्ह्याचे पोलीस अधीक्षक डॉ. महेश्वर रेड्डी यांची बदली केली असून त्यांच्या जागी श्रीकांत धिवरे यांची नियुक्ती करण्यात आली आहे. त्यामुळे आता जळगाव जिल्ह्याची धुरा धिवरे यांच्या हाती येणार आहे.
डॉ. महेश्वर रेड्डी यांची पुणे येथील राज्य गुन्हे अन्वेषण विभाग (सीआयडी) येथे पोलीस अधीक्षक म्हणून नियुक्ती करण्यात आली आहे. गेल्या दोन वर्षांच्या कार्यकाळात त्यांनी जळगाव जिल्ह्यात गुन्हेगारीवर प्रभावी नियंत्रण मिळवत अनेक गंभीर गुन्ह्यांची उकल केली. त्यांच्या शिस्तबद्ध कार्यपद्धतीमुळे पोलीस दलाचे मनोबल उंचावले होते.
दरम्यान, नवनियुक्त पोलीस अधीक्षक श्रीकांत धिवरे यांच्यासमोर आता जिल्ह्यात कायदा व सुव्यवस्था अबाधित राखण्याचे मोठे आव्हान असणार आहे. डॉ. रेड्डी यांनी निर्माण केलेला गुन्हेगारीवरील वचक कायम ठेवत नागरिकांचा विश्वास संपादन करण्यासाठी धिवरे यांना प्रभावी पावले उचलावी लागणार आहेत.
महाराष्ट्र शासनाच्या गृह विभागाने २० एप्रिल २०२६ रोजी जारी केलेल्या आदेशानुसार राज्यातील अनेक वरिष्ठ पोलीस अधिकाऱ्यांच्या बदल्या करण्यात आल्या आहेत. या फेरबदलांमुळे राज्यातील पोलीस यंत्रणा अधिक सक्षम करण्याचा प्रयत्न असल्याचे शासनाकडून स्पष्ट करण्यात आले आहे.
जळगाव जिल्ह्यात आता नव्या नेतृत्वाखाली कायदा व सुव्यवस्था कशी राखली जाते, याकडे नागरिकांचे लक्ष लागले आहे.
