नवराज्य डिजिटल न्यूज नेटवर्क
शिरपूर (प्रतिनिधी) स्वार्थ, फसवणूक आणि बेईमानीने भरलेल्या आजच्या काळात माणुसकी, प्रामाणिकपणा आणि सद्भावना हरवत चालल्या आहेत, असं वाटत असतानाच शिरपूरच्या एका महिलेने आपली नितीमत्ता दाखवत समाजाला नवा प्रकाश दिला आहे.
काही महिन्यांपूर्वी शहरात प्रसिद्ध कथा वक्ते प्रदीप मिश्रा यांची शिवपुराण कथा रंगली होती. हजारो भाविकांच्या उपस्थितीत अध्यात्माचा भारावलेला माहोल तयार झाला होता. अशा गर्दीत हाॅटेल केतनचे मालक सुनील सुरेश चौधरी यांची १५ ग्रॅम वजनाची सोन्याची अंगठी कुठेतरी हरवली. ही अंगठी केवळ दागिना नव्हता, तर त्यांच्यासाठी खास भावना जोडलेला एक मौल्यवान स्मृतिचिन्ह होता. अशा वेळी, प्रियंका भूषण बारी या महिलेला ही अंगठी सापडली. एका क्षणात त्या अंगठीच्या किंमतीचा मोह मनात येणं साहजिक होतं. पण त्यांनी मोहाचा मार्ग न निवडता, प्रामाणिकपणाचा आदर्श ठेवीत अंगठी मूळ मालकास परत केली.
अंगठी परत करताना प्रियंका म्हणाल्या, “ही अंगठी माझ्या हाती आली, ते फक्त योगायोग. पण ती माझी नव्हती. जी वस्तू आपली नाही, तिला ठेवून मिळणारं सुख कधीच खरं समाधान देत नाही.” त्यांच्या या शब्दांनी उपस्थितांची मनं हेलावली.
या प्रसंगी कथेचे प्रमुख मोहनजी हुलेसींगजी पाटील, प्रशांत राजाराम बडगुजर, अविनाश पवार, किरण जैन, भूषण गजानन बारी, नलिनी गजानन बारी आणि गोरख पुना बारी यांनी प्रियंका यांचा सत्कार करत त्यांचे आभार मानले. उपस्थितांनी टाळ्यांच्या गजरात तिच्या प्रामाणिकतेचं स्वागत केलं. ही घटना एक छोटीशी वाटू शकते, पण यातून दिला गेलेला संदेश मोठा आहे. या स्वार्थी जगात अजूनही अशी माणसं आहेत जी आपल्या नीतिमत्तेच्या मूल्यांवर ठाम आहेत. प्रियंका बारी यांची ही कृती केवळ अंगठी परत करण्यापुरती मर्यादित नाही, तर ती आजच्या तरुण पिढीसाठी एक दीपस्तंभ ठरावी अशीच आहे. शेवटी एवढंच सोन्याची अंगठी हरवली, पण त्या निमित्ताने सोन्यासारखं मन लाभलेली व्यक्ती समाजासमोर आली, असे म्हणणे वावगे ठरणार नाही.
