नवराज्य Live न्यूज नेटवर्क
जळगाव : माऊली नगर, खेडी बुद्रुक येथे दुचाकीची लाईट सुरू-बंद केल्याचा जाब विचारल्याच्या कारणावरून धारदार चॉपरने हल्ला केल्याची धक्कादायक घटना घडली. या हल्ल्यात एका व्यक्तीचा मृत्यू झाला, तर दुसरी व्यक्ती गंभीर जखमी झाली. या प्रकरणातील संशयित आरोपीला एमआयडीसी पोलिसांनी अवघ्या २४ तासांत ताब्यात घेतले आहे. मयूर चैत्राम जाधव (रा. माऊली नगर, खेडी बुद्रुक) असे ताब्यात घेतलेल्या संशयिताचे नाव आहे.
मिळालेल्या माहितीनुसार, माऊली नगर येथे मंगळवारी रात्री सुमारे ८.३० वाजण्याच्या सुमारास संशयित मयूर जाधव मोटारसायकलवरून आला. त्याने रस्त्याच्या कडेला बसलेल्या महिलांच्या दुचाकीची लाईट वारंवार सुरू-बंद करण्यास सुरुवात केली. याबाबत जाब विचारण्यासाठी किरण विठ्ठल पाटील (वय ४४) आणि किशोर छगन पाटील (वय ३५, दोघे रा. माऊली नगर, खेडी बुद्रुक) पुढे आले. त्यावेळी संशयिताने संतापातून धारदार चॉपरने दोघांवर वार केल्याचे वृत्त आहे.
या हल्ल्यात किरण पाटील यांचा मृत्यू झाला, तर किशोर पाटील गंभीर जखमी झाले. जखमी किशोर पाटील यांना उपचारासाठी रुग्णालयात दाखल करण्यात आले. या घटनेनंतर परिसरात खळबळ उडाली.
सीसीटीव्ही फुटेजच्या आधारे तपास
घटनेचे गांभीर्य लक्षात घेऊन पोलीस निरीक्षक बबन आव्हाड यांनी गुन्हे शोध पथकाला तातडीने तपास करण्याचे निर्देश दिले. पथकाने घटनास्थळाची बारकाईने पाहणी केली. परिसरातील सीसीटीव्ही फुटेज तपासण्यात आले तसेच तांत्रिक विश्लेषणाच्या मदतीने संशयिताचा शोध घेण्यात आला.
पोलिसांच्या या तपासानंतर मयूर चैत्राम जाधव याला घटनेच्या २४ तासांच्या आत ताब्यात घेण्यात आले. या प्रकरणी किशोर पाटील यांच्या फिर्यादीवरून एमआयडीसी पोलीस ठाण्यात खुनाचा गुन्हा दाखल करण्यात आला असून, पुढील तपास एमआयडीसी पोलीस आणि गुन्हे शोध पथक करीत आहेत.
