नवराज्य Live न्यूज नेटवर्क
जळगाव (योगेश सुने चीफ एडिटर) : राष्ट्रवादी काँग्रेस शरदचंद्र पवार पक्षाचे ज्येष्ठ नेते तथा माजी मंत्री एकनाथराव खडसे यांच्या अमृत महोत्सवी सोहळ्याची निमंत्रण पत्रिका सध्या राजकीय वर्तुळात चर्चेचा विषय ठरत आहे. खडसे यांच्या अभिष्टचिंतन सोहळ्याला मुख्यमंत्री देवेंद्र फडणवीस यांच्यासह महायुतीतील अनेक दिग्गज नेत्यांची उपस्थिती राहणार असल्याने या कार्यक्रमाकडे राजकीय दृष्टिकोनातून विशेष लक्ष लागले आहे. 30रोजी मुक्ताईनगर तालुक्यातील कोथळी येथे हा अमृत महोत्सव साजरा करण्यात येणार आहे.सोहळ्याच्या पत्रिकेत मुख्यमंत्री . देवेंद्र फडणवीस तसेच राष्ट्रवादी काँग्रेसचे राष्ट्रीय अध्यक्ष शरद पवार यांची विशेष उपस्थिती नमूद करण्यात आली आहे.
विशेष म्हणजे, पत्रिकेच्या पुढील पानावर राज्यातील विविध राजकीय पक्षांतील मंत्री, माजी मंत्री, खासदार, आमदार आणि प्रमुख नेत्यांची छायाचित्रे देण्यात आली आहेत. यामध्ये महायुतीतील अनेक प्रमुख नेत्यांसह विरोधी पक्षातील नेत्यांचाही समावेश आहे. त्यामुळे खडसे यांच्या अमृत महोत्सवी सोहळ्याच्या निमित्ताने सर्वपक्षीय राजकीय नेते एकत्र येणार का? याबाबत राजकीय चर्चांना उधाण आले आहे.
एकनाथराव खडसे यांनी आपल्या प्रदीर्घ राजकीय कारकिर्दीत राज्याच्या राजकारणात महत्त्वाची भूमिका बजावली आहे. त्यामुळे त्यांच्या अमृत महोत्सवी सोहळ्यासाठी तयार करण्यात आलेल्या या भव्य निमंत्रण पत्रिकेत विविध राजकीय पक्षांतील नेत्यांना स्थान मिळाल्याचे दिसून येते.
विशेषतः राष्ट्रवादी काँग्रेस शरदचंद्र पवार पक्षात असलेल्या खडसेंच्या कार्यक्रमाला मुख्यमंत्री देवेंद्र फडणवीस यांची उपस्थिती आणि त्याचवेळी शरद पवार यांचीही उपस्थिती ही बाब राजकीयदृष्ट्या महत्त्वाची मानली जात आहे. खडसे यांच्या अभिष्टचिंतनाच्या निमित्ताने फडणवीस आणि पवार एकाच कार्यक्रमात उपस्थित राहणार असल्याने या सोहळ्यातील राजकीय संदेश काय असणार, याची उत्सुकता राजकीय वर्तुळात निर्माण झाली आहे.
पत्रिकेत राज्यातील अनेक प्रमुख नेत्यांची नावे व छायाचित्रे असल्याने हा केवळ वाढदिवसाचा सोहळा न राहता राजकीय शक्तिप्रदर्शन आणि सर्वपक्षीय नेत्यांच्या भेटीगाठींचे व्यासपीठ ठरणार का? याकडे आता सर्वांचे लक्ष लागले आहे.
दरम्यान, पत्रिकेतील नेत्यांची उपस्थिती ही निमंत्रणातील नोंद असून प्रत्यक्ष कार्यक्रमाला कोणकोणते नेते उपस्थित राहतात, याकडेही राजकीय निरीक्षकांचे लक्ष राहणार आहे. मात्र आता या सोहळ्याच्या निमित्ताने पुन्हा एकदा आ.एकनाथराव खडसे यांच्या भाजप प्रवेश याबाबत पुन्हा एकदा चर्चा सुरू झाली आहे. ते या सोहळ्या दरम्यान प्रवेश करणार काय? मुख्यमंत्री या कार्यक्रमाला येतील काय ? या सर्व प्रश्नांची उत्तरं आता या अभिष्टचिंतन सोहळ्याला मिळतील काय याबाबत राजकीय क्षेत्रात सह त्यांच्या चाहत्यांमध्ये उत्सुकता लागली आहे.
