जळगाव – ( योगेश सुने चीप एडिटर ) नवराज्य Live न्यूज
महानगरपालिकेच्या मालकीच्या मोहाडी गट क्रमांक 60 येथील सुमारे 13 एकर जागेवर अतिक्रमणाचा गंभीर प्रकार समोर आला असून, अज्ञात व्यक्तींनी तांबापुरा भागातील रहिवाशांना प्रत्येकी सुमारे पाच हजार रुपये घेऊन झोपडीसाठी जागा विकल्याची धक्कादायक माहिती महापौर दीपमाला काळे यांनी पत्रकार परिषदेत दिली.
महापालिकेतील महापौर कार्यालयात आयोजित पत्रकार परिषदेत बोलताना त्यांनी सांगितले की, कोरोना काळानंतर ऑक्टोबर 2022 पासून या परिसरात काही तुरळक झोपड्या दिसू लागल्या. मात्र, 2024 नंतर अचानकपणे मोठ्या प्रमाणात झोपड्यांचे अतिक्रमण उभे राहिले आहे. तांबापुरा परिसरातील काही नागरिकांनी आपली घरे विकल्यानंतर अज्ञात व्यक्तींनी त्यांना ही मनपाची जागा परस्पर विकल्याचे समोर आले आहे.
सदर जागा माजी नगराध्यक्ष तुकाराम श्रीपत चौधरी यांनी महानगरपालिकेसाठी विकत घेतली होती. 1997 ते 2011 या कालावधीत येथे अटलांटा कंपनीचा क्रशर होता. त्यानंतर जागा रिकामी पडून होती आणि 2017-18 मध्ये स्लॉटर हाऊसही बंद करण्यात आले.
महापौर काळे यांनी पुढे सांगितले की, शासनाच्या महसूल विभागाच्या परिपत्रकानुसार 2011 पूर्वीच्या शासकीय जागांवरील अतिक्रमण नियमित करण्याची तरतूद आहे; मात्र महानगरपालिका मालकीच्या जागांवर हा नियम लागू होत नाही. तसेच 2022 नंतर झालेल्या अतिक्रमणांनाही कोणतीही कायदेशीर मान्यता मिळणार नाही.
महानगरपालिकेच्या जागा आधीच मर्यादित असल्याने त्या जतन करणे आवश्यक असून, संबंधित जागेभोवती कंपाउंड वॉल उभारण्यासाठी अंदाजपत्रक तयार करण्यात आले आहे. लवकरच ही जागा संरक्षित करण्याची कार्यवाही करण्यात येणार आहे.
नागरिकांनी या ठिकाणी कोणतेही अतिक्रमण करू नये, अन्यथा प्रशासनाकडून कठोर कारवाई करण्यात येईल, असा इशाराही महापौरांनी दिला.
या पत्रकार परिषदेस उपमहापौर मनोज चौधरी, स्थायी समिती सभापती डॉ. चंद्रशेखर पाटील, स्थायी समिती सदस्य ॲड. सुचिता हाडा यांच्यासह इतर पदाधिकारी उपस्थित होते.
