नवराज्य Live न्यूज नेटवर्क
जळगाव : मुलांच्या तुलनेत मुलींची संख्या दिवसेंदिवस कमी होत असल्याने गर्भलिंग निदान आणि त्यानंतर होणाऱ्या गर्भपाताचा मुद्दा पुन्हा ऐरणीवर आला आहे. गर्भलिंग निदान करून मुलगा असल्यास गर्भ ठेवला जातो, तर मुलगी असल्यास गर्भपात केला जात असल्याच्या प्रकारांना आळा घालण्यासाठी केंद्र सरकारने गर्भलिंग निदानावर कायदेशीर बंदी घातली आहे. गर्भलिंग निदान करणे किंवा त्यासाठी मदत करणे हा कायद्याने गुन्हा असून, दोषींवर शिक्षेची तरतूद आहे.
मात्र, असे असतानाही जळगाव शहरात गर्भलिंग निदानाच्या प्रकारांना ऊत आल्याची चर्चा आहे. या पार्श्वभूमीवर प्रशासनाने काही प्रकरणांची दखल घेत कारवाई सुरू केली असल्याची माहिती समोर येत आहे.
काही दिवसांपूर्वी जळगाव शहरातील आर्या हॉस्पिटलवर कारवाई करून सोनोग्राफी मशीन सील करण्यात आली होती. तसेच, शहरातील काही रुग्णालयांमधील डॉक्टरांना सोनोग्राफीचा वापर आणि गर्भलिंग निदानासंदर्भात PC-PNDT विभाग तसेच आरोग्य विभागाच्या अधिकाऱ्यांकडून ताकीद देण्यात आल्याचे समजते.
दरम्यान, जळगाव शहरातील काही डॉक्टर आणि सोनोग्राफी केंद्रे PC-PNDT विभागाच्या आणि आरोग्य विभागाच्या रडारवर असल्याची माहिती आता समोर येत आहे. त्यामुळे प्रशासनाकडून आगामी काळात आणखी काही ठिकाणी तपासणी अथवा कारवाई केली जाणार का, याकडे लक्ष लागले आहे. गर्भलिंग निदानासारख्या गंभीर प्रकारांना आळा घालण्यासाठी प्रशासनाने नियमित तपासणी, नोंदणी कागदपत्रांची पडताळणी आणि नियमांचे उल्लंघन करणाऱ्यांवर कठोर कारवाई करण्याची गरज व्यक्त होत आहे.
