नवराज्य न्यूज नेटवर्क
यावल : शेळगाव बॅरेज येथील तापी नदीपात्रात मासेमारी करण्यासाठी गेलेला नशिराबाद (ता. जळगाव) येथील तरुण पाण्याच्या प्रवाहात वाहून गेल्याची घटना रविवारी घडली. सिराज टेलर असे वाहून गेलेल्या तरुणाचे नाव असून, सायंकाळपर्यंत त्याचा शोध लागला नव्हता. सोमवारी सकाळी पुन्हा शोधमोहीम राबविण्यात येणार आहे.
मिळालेल्या माहितीनुसार, नशिराबाद येथील सिराज टेलर हे अन्सार शेख यांच्यासोबत रविवारी दुपारी सुमारे १२ वाजण्याच्या सुमारास दुचाकीवरून शेळगाव बॅरेज परिसरात मासेमारीसाठी गेले होते. तापी नदीपात्राच्या उत्तरेकडील भागात मासेमारी करत असताना सिराज टेलर हे पाण्यात उतरले.
पाण्याचा अंदाज न आल्याने ते अचानक खोल पाण्यात बुडाले. त्याचवेळी बॅरेजमधून सोडण्यात आलेल्या पाण्याच्या प्रवाहात ते वाहून गेले. हा प्रकार उपस्थित नागरिकांच्या निदर्शनास येताच परिसरात एकच खळबळ उडाली.
घटनेची माहिती अन्सार शेख यांनी नशिराबाद येथे दिल्यानंतर नशिराबाद पोलिसांनी घटनास्थळी धाव घेतली. स्थानिक नागरिकांनीही मोठ्या संख्येने घटनास्थळी गर्दी केली. त्यानंतर सिराज टेलर यांचा तापी नदीपात्रात शोध घेण्यासाठी शोधमोहीम सुरू करण्यात आली.
सायंकाळपर्यंत नदीपात्रात तसेच परिसरात शोध घेण्यात आला; मात्र सिराज टेलर यांचा शोध लागला नाही. सोमवारी सकाळी पुन्हा शोधमोहीम सुरू करण्यात येणार असल्याची माहिती मिळाली आहे.
सिराज टेलर यांच्या पश्चात दोन मुली आणि एक मुलगा असा परिवार असल्याची माहिती समोर आली आहे.
