नवराज्य Live न्यूज नेटवर्क
पाळधी : त्रिमूर्ती शिक्षण प्रसारक मंडळाच्या त्रिमूर्ती इन्स्टिट्यूट ऑफ फार्मसी, पाळधी येथे १५ ऑगस्ट रोजी ८० वा स्वातंत्र्य दिन उत्साहात साजरा करण्यात आला. यावेळी महाविद्यालयातील दिवंगत विद्यार्थी रुपेश राजेंद्र पाटील यांच्या आई आशाबाई पाटील व वडील राजेंद्र भीमराव पाटील यांच्या हस्ते ध्वजारोहण करण्यात आले.
ध्वजारोहणानंतर रुपेश पाटील यांच्या पालकांना कवयित्री बहिणाबाई चौधरी उत्तर महाराष्ट्र विद्यापीठाच्या विद्यार्थी विकास विभागांतर्गत विद्यार्थी विमा योजनेतून मंजूर झालेला पाच लाख रुपयांचा विमा धनादेश सुपूर्द करण्यात आला. ही विमा रक्कम मंजूर होण्यासाठी महाविद्यालयाचे विद्यार्थी विकास अधिकारी प्रा. कुलदीप पाटील व विद्यार्थी विकास प्रभारी श्री. सचिन जाधव यांनी सातत्याने पाठपुरावा केला.
याशिवाय कुलगुरू विद्यार्थी सहायता निधीतून मंजूर झालेला १० हजार रुपयांचा धनादेश महाविद्यालयाचे प्राचार्य डॉ. तुषार देशमुख यांच्या हस्ते रुपेशच्या पालकांना देण्यात आला. तसेच रुपेशचे क्लासमेट्स, सर्व शिक्षक-शिक्षकेतर कर्मचारी आणि संस्थेचे संचालक श्री. मनोज पाटील यांनी एकत्रितपणे जमा केलेली ३५ हजार रुपयांची रोख मदत देखील पालकांना सुपूर्द करण्यात आली.
यावेळी संस्थेचे चेअरमन मनोज पाटील, सचिव सुनील पाटील, प्राचार्य डॉ. तुषार देशमुख, शिक्षक-शिक्षकेतर कर्मचारी तसेच विद्यार्थी उपस्थित होते.
यावेळी चेअरमन श्री. मनोज पाटील यांनी, “रुपेशच्या कुटुंबीयांचे दुःख कोणतीही आर्थिक मदत भरून काढू शकत नाही; मात्र या कठीण प्रसंगी संपूर्ण त्रिमूर्ती परिवार त्यांच्या पाठीशी खंबीरपणे उभा आहे,” अशी भावना व्यक्त केली.
दिवंगत विद्यार्थ्याच्या पालकांच्या हस्ते ध्वजारोहण करून त्यानंतर कुटुंबीयांना आर्थिक मदत सुपूर्द करत महाविद्यालयाने माणुसकी, संवेदनशीलता आणि सामाजिक बांधिलकीचा आदर्श निर्माण केला. कार्यक्रमाचे सूत्रसंचालन व आभार प्रदर्शन प्रा. रोहित बाविस्कर यांनी केले.
