कावड यात्रेत काळाचा घाला! १० वर्षीय प्रबलचा अपघाती मृत्यू; संतप्त जमावाकडून आयशर पेटवला

नवराज्य Live न्यूज नेटवर्क

जळगाव : कावड यात्रेचा उत्साह सुरू असतानाच जळगाव-ममुराबाद रस्त्यावर सोमवारी सायंकाळी घडलेल्या भीषण अपघाताने परिसर हादरला. म्हाळसादेवी मंदिराजवळ कावड यात्रेत सहभागी झालेल्या १० वर्षीय प्रबल राजू गवळी या मुलाला आयशर वाहनाने धडक दिली. या दुर्घटनेत प्रबलचा घटनास्थळीच मृत्यू झाला. शनिपेठ परिसरातील गवळीवाड्यातून कावड यात्रा म्हाळसादेवी मंदिराकडे आली होती. यात्रा पूर्ण करून भाविक परतीच्या मार्गावर असताना जळगावकडून चोपड्याकडे जाणाऱ्या MH-20-EG-3593 क्रमांकाच्या आयशर वाहनाची प्रबलला धडक बसली. धडकेनंतर मुलाला वाहनाने काही अंतर ओढत नेल्याचे प्रत्यक्षदर्शींनी सांगितले.

अपघाताची माहिती मिळताच प्रबलचे नातेवाईक आणि नागरिक घटनास्थळी मोठ्या संख्येने जमा झाले. चिमुरड्याचा मृत्यू झाल्याचे समोर येताच कुटुंबीयांचा आक्रोश सुरू झाला. एकुलता एक मुलगा गमावल्याने गवळी कुटुंबावर दुःखाचा डोंगर कोसळला.

दरम्यान, संतप्त नातेवाईक आणि नागरिकांनी रस्त्यावर ठिय्या देत वाहतूक रोखली. अपघातास कारणीभूत ठरलेल्या चालकाला तातडीने ताब्यात घेऊन कठोर कारवाई करावी, अशी मागणी करण्यात आली. चालकावर कारवाई होईपर्यंत मृतदेह घटनास्थळावरून हलवू नये, अशी भूमिका नातेवाईकांनी घेतली.

परिस्थिती चिघळत असतानाच संतप्त जमावाकडून अपघातग्रस्त आयशर वाहनाला आग लावण्यात आली. वाहन किराणा मालाने भरलेले असल्याने आगीचे लोळ उठले आणि परिसरात काही काळ भीतीचे वातावरण निर्माण झाले.

परिस्थिती नियंत्रणात आणण्यासाठी पोलिसांनी घटनास्थळी मोठा बंदोबस्त तैनात केला. जमावाला शांत करण्याच्या प्रयत्नांदरम्यान तालुका पोलीस ठाण्याचे पोलीस निरीक्षक शशिकांत पाटील यांच्याशी धक्काबुक्की झाल्याचे सांगण्यात येत आहे.

सायंकाळी सुमारे पाच वाजल्यापासून साडेसहा वाजेपर्यंत या मार्गावरील वाहतूक ठप्प झाली होती. रस्त्याच्या दोन्ही बाजूंना वाहनांच्या मोठ्या रांगा लागल्या. परिस्थिती नियंत्रणात आणण्यासाठी वरिष्ठ पोलीस अधिकाऱ्यांसह मोठा पोलीस बंदोबस्त घटनास्थळी दाखल झाला.

दरम्यान, पोलिसांनी आयशर चालकाला ताब्यात घेतले असून अपघाताबाबत पुढील कायदेशीर कारवाई सुरू आहे. चालकावर कठोर कारवाई करण्याची मागणी प्रबलच्या नातेवाईकांकडून करण्यात आली आहे.

कावड यात्रेच्या भक्तिमय वातावरणात अचानक घडलेल्या या दुर्घटनेने आनंदाचे वातावरण शोकाकुल झाले असून, १० वर्षीय प्रबलच्या मृत्यूने परिसरात हळहळ व्यक्त केली जात आहे.