जळगाव माजी नगरसेवक बंटी अनंत जोशी यांनी आज सायंकाळी राहत्या घरी आत्महत्या केल्याची घटना घडली. बंटी जोशी महापालिकेचे माजी नगरसेवक असून काही काळ मनसेमध्ये होते. त्यांच्या आत्महत्येच्या कारणाचा अद्याप शोध लागला नसला तरी पुढील तपास चालू आहे. दरम्यान जिल्हा सामान्य रुग्णालयात बंटी जोशी यांच्या समर्थकांनी प्रचंड गर्दी केली आहे.
या बाबत सविस्तर माहिती अशी की, जळगाव शहर महानगरपालिकेतील नगरसेवक अनंत उर्फ बंटी जोशी (वय-५०) यांनी शुक्रवार दि. १ ऑगस्ट रोजी आपल्या जयनगर परिसरातील राहत्या घरी गळफास घेत आत्महत्या केल्याची घटना घडली. सायंकाळी ७.३० च्या सुमारास हा प्रकार उघडकीस आला. नातेवाईकांनी बंटी जोशी यांना जिल्हा रुग्णालयात दाखल केले असता डॉक्टरांनी त्यांना मृत घोषित केले.
बंटी जोशी हे जळगाव मनपातील अभ्यासू नगरसेवक, हसत खेळत व्यक्तिमत्व असल्याने त्यांच्या मृत्यूची माहिती मिळताच नातेवाईक आणि मित्रपरिवारने जिल्हा शासकीय रुग्णालयात धाव घेतली. जिल्हा रुग्णालयात माजी महापौर नितीन लढ्ढा, विष्णु भंगाळे, सुनील महाजन, शरद तायडे, सुनील झंवर, शामकांत सोनवणे, आयुष मणियार, पीयूष कोल्हे, पीयूष मणियार, सरिता माळी, कैलास आप्पा सोनवणे, कुंदन काळे, गणेश सोनवणे, जमील देशपांडे, प्रवीण कोल्हे यांच्यासह मित्र परिवार जमला आहे.
माजी नगरसेवक अनंत जोशी हे ‘बंटी जोशी’ या नावाने जळगाव मध्ये प्रसिद्ध व्यक्तिमत्व होते. त्यांनी सामाजिक क्षेत्रामध्ये बऱ्याच प्रमाणावर नागरिकांच्या समस्यांना सोडवण्यासाठी आवाज उठवला होता. महापालिकेमध्ये एक ‘अन्यायाविरुद्ध लढणारा नगरसेवक’ म्हणून त्यांची ओळख होती. विरोधक म्हणून त्यांनी लोकशाही मधील आपली भूमिका यशस्वीपणे मांडल्यामुळे जनमानसात त्यांना ‘बंटी भाऊ’ अशी ओळख निर्माण झाली होती. अन्यायाला वाचा फोडणाऱ्या या माजी नगरसेवकाच्या आत्महत्यामुळे समर्थक आणि मित्र परिवारामध्ये मोठ्या प्रमाणावर शोक व्यक्त होत आहे. त्यांच्या मृत्यूचे कारण अद्याप स्पष्ट झाले नसले तरी पुढील तपास सुरू आहे.
