नवराज्य Live न्यूज नेटवर्क
जळगाव : शहरातील आव्हाने रोडवरील के.सी. पार्कजवळ असलेल्या मोकळ्या परिसरात ग्लॉसी आयबिस ( मोर शराटी) अर्थात छोटा शराटी (Glossy Ibis) या पाणपक्ष्यांची जोडी पाहायला मिळाली. शहराच्या परिसरात या पक्ष्यांचे आगमन झाल्याने पक्षीप्रेमी आणि निसर्गप्रेमींचे लक्ष वेधले गेले आहे.
या पक्ष्याबाबतची माहिती पक्षीमित्र वासुदेव वाढे यांनी ‘नवराज्य लाईव्ह’शी बोलताना दिली.
मोर शराटी हा स्थानिक तसेच स्थलांतरित पाणपक्षी आहे. हा पक्षी प्रामुख्याने पाणथळ जागा, तलाव आणि नदीच्या परिसरात आढळतो. मात्र, जळगाव शहरातील के.सी. पार्कजवळील मोकळ्या परिसरात या पक्ष्यांची जोडी आढळून आल्याने शहरातील जैवविविधतेकडे पुन्हा एकदा लक्ष वेधले गेले आहे.
बेडूक, मासे, खेकडे हे प्रमुख खाद्य
मोर शराटीच्या आहारात बेडूक, मासे, खेकडे, गोगलगायी, नाकतोडे आणि ड्रॅगनफ्लाय यांसारख्या जलचर आणि कीटकांचा समावेश होतो. पाणथळ आणि चिखलयुक्त भागात खाद्य शोधताना हा पक्षी दिसतो.
लांब वाकलेली चोच हे प्रमुख वैशिष्ट्य
या पक्ष्याची लांबसर वाकलेली चोच हे त्याचे विशेष वैशिष्ट्य आहे. चोचीच्या टोकावर असलेल्या संवेदनशील अवयवांच्या मदतीने तो चिखलातील जलचर स्पर्शाने शोधून काढतो.
पाणवठ्यालगतच्या झाडांवर करतो घरटे
मोर शराटी हा जंगलातील पक्षी नसून पाणवठ्याच्या जवळील झाडांवर घरटे करून राहतो. भारतभर या पक्ष्याचे अस्तित्व आढळते. स्थानिक तसेच स्थलांतरित पक्षी म्हणूनही त्याचे दर्शन होते.
भारतीय वन्यजीव संरक्षण कायद्यानुसार या पक्ष्याला दुसऱ्या श्रेणीत स्थान देण्यात आले आहे. जळगाव शहराच्या परिसरात या पक्ष्यांचे दर्शन घडल्याने स्थानिक पाणवठे, मोकळे परिसर आणि जैवविविधता जपण्याचे महत्त्व अधोरेखित झाले आहे.
