नवराज्य Live न्यूज नेटवर्क
जळगाव : जुन्या टी.बी. सेंटर परिसरात जळगाव शहर महानगरपालिकेच्या महापौर दीपमाला काळे यांनी पाहणी दौरा केला. या पाहणीदरम्यान कामातील त्रुटी आणि अस्वच्छतेवरून महापौरांनी सफाई ठेकेदाराला चांगलेच झापले. तसेच घंटागाड्यांची वेळेवर स्वच्छता न राखल्याबद्दल बिव्हिजी कंपनीच्या प्रतिनिधीला तीव्र शब्दांत जाब विचारला.
या पाहणी दौऱ्याला उपमहापौर मनोज चौधरी, अतिरिक्त आयुक्त शोभा बाविस्कर, शहर अभियंता योगेश बोरोले आणि अभियंता योगेश वाणी आदी अधिकारी उपस्थित होते. महापौरांनी रॅम्पच्या बांधकामाची पाहणी करून विकासकाला विविध दुरुस्त्यांच्या सूचना दिल्या. शहर अभियंत्यांनी रॅम्पवर वाहन चढवून घेतलेल्या चाचणीचा व्हिडीओ मोबाईलवर महापौरांना दाखवला. रॅम्पवर बंदिस्त छत असल्याने काम अधिक व्यवस्थित होईल, असा विश्वास अभियंत्यांनी व्यक्त केला.
“घंटागाड्या नियमित वॉशिंग का केल्या जात नाहीत? या कामात हलगर्जीपणा का केला जातोय?” असा सवाल महापौरांनी बिव्हिजी कंपनीच्या प्रतिनिधीला विचारला. यावर ८८ पैकी ६० घंटागाड्या सुरू असून काही गाड्यांचे पार्ट मिळत नसल्याने त्या नादुरुस्त असल्याचे प्रतिनिधीने सांगितले.
घंटागाड्यांच्या येण्या-जाण्यासाठी रस्ता तात्काळ सरळ करावा आणि शहरातील कचरा साचण्याची समस्या लवकरात लवकर दूर करावी. बंद पडलेल्या सर्व नादुरुस्त घंटागाड्यांची तात्काळ दुरुस्ती करून त्या सेवेत दाखल कराव्यात, अशा सूचना महापौर दीपमाला काळे यांनी दिल्या.
