नवराज्य Live न्यूज नेटवर्क
बोदवड – तालुक्यातील जामठी येथे अल्पवयीन विद्यार्थिनीशी गैरवर्तन केल्याच्या आरोपावरून एका खासगी क्लासच्या शिक्षकाविरोधात संताप व्यक्त करत शेकडो नागरिकांचा जमाव आक्रमक झाला. संशयित शिक्षकाला पोलिसांनी ताब्यात घेतल्यानंतरही जमाव शांत झाला नाही. संतप्त नागरिकांनी शिक्षकाची कार पेटवून दिली आणि त्याला पोलिसांच्या ताब्यातून स्वतःच्या ताब्यात देण्याची मागणी केली. यावेळी पोलिसांवर दगडफेक झाल्याने परिस्थिती तणावपूर्ण बनली.
जामठी येथील एका खासगी क्लासमध्ये शिकणाऱ्या अल्पवयीन विद्यार्थिनीशी शिक्षकाने गैरवर्तन केल्याचा आरोप समोर आला. या घटनेची माहिती परिसरात पसरताच नागरिकांमध्ये तीव्र संताप निर्माण झाला. प्रकरणाचे गांभीर्य लक्षात घेऊन बोदवड पोलिसांनी तत्काळ कारवाई करत संशयित शिक्षकाला ताब्यात घेतले.
मात्र, पोलिसांनी संशयिताला ताब्यात घेतल्यानंतरही जमावाचा रोष कमी झाला नाही. मोठ्या संख्येने नागरिक संशयित शिक्षकाच्या घरासमोर जमा झाले. यावेळी जमावाने घरासमोर उभी असलेली त्याची कार पेटवून दिली.
यानंतर संशयित शिक्षकाला पोलिसांच्या ताब्यातून जमावाच्या स्वाधीन करण्याची मागणी करण्यात आली. पोलिसांनी कायदेशीर प्रक्रिया सुरू असल्याचे सांगत संशयिताला सुरक्षितपणे बाहेर काढण्याचा प्रयत्न केला. त्यावेळी जमाव आणि पोलिसांमध्ये झटापट झाली.
परिस्थिती अधिक चिघळत असताना काही नागरिकांकडून पोलिसांच्या दिशेने दगडफेक करण्यात आली. त्यामुळे कायदा व सुव्यवस्थेचा प्रश्न निर्माण झाल्याने पोलिसांनी जमावाला पांगवण्यासाठी अश्रुधुराच्या नळकांड्या फोडल्या. त्यानंतरही परिस्थिती नियंत्रणात न आल्याने पोलिसांनी सौम्य लाठीमार केला. अखेर जमाव हळूहळू पांगला.
दरम्यान, घटनेची माहिती मिळताच जिल्हा पोलीस अधीक्षक श्रीकांत धिवरे यांच्यासह वरिष्ठ पोलीस अधिकारी आणि मोठा पोलीस बंदोबस्त जामठी येथे दाखल झाला. वरिष्ठ अधिकाऱ्यांच्या उपस्थितीत परिस्थिती नियंत्रणात आणण्यात आली असून गावातील तणाव सध्या निवळला आहे.
या प्रकरणी बोदवड पोलीस ठाण्यात पॉक्सो कायद्यानुसार गुन्हा दाखल करण्याची प्रक्रिया सुरू असून संशयित शिक्षकाला पोलिसांनी ताब्यात घेतले आहे. घटनेचा पुढील तपास बोदवड पोलीस करीत आहेत.
