नवराज्य Live न्यूज नेटवर्क
जळगाव : येथील उप अधीक्षक, भूमी अभिलेख कार्यालयातील भूकरमापक राहुल ताराचंद कोळी याला ७१ हजार ७०० रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहाथ अटक केली. या प्रकरणात कार्यालयातील डेटा एन्ट्री ऑपरेटर कल्पेश सोमनाथ पाटील याचाही सहभाग समोर आला असून त्याच्याविरुद्ध गुन्हा दाखल करण्याची प्रक्रिया सुरू आहे.
तक्रारदाराच्या शेतजमिनीची मोजणी करून गट हिस्सा व पोट हिस्सा पडताळणी करण्यासाठी भूमी अभिलेख कार्यालयाकडे प्रस्ताव होता. या कामासाठी आरोपी राहुल कोळी याने सुरुवातीला ७० हजार रुपयांची लाच मागितल्याची तक्रार तक्रारदाराने १७ जुलै २०२६ रोजी एसीबीकडे केली होती. त्यानंतर पडताळणीदरम्यान आरोपीने मोजणीची नोटीस पाठविण्यासाठी ६२५ रुपयांच्या स्टॅम्पची मागणी केली. तसेच मोजणीच्या दिवशी पुन्हा स्वतःसाठी व कार्यालयाच्या नावाखाली ७० हजार रुपये, दोन वेळच्या नोटीससाठी १,२०० रुपये आणि खाजगी मदतनीसासाठी ५०० रुपये, अशी एकूण ७१ हजार ७०० रुपयांची मागणी केल्याचे निष्पन्न झाले.
आज (२९ जुलै) जळगाव तालुक्यातील kara बसस्थानक परिसरात सापळा रचण्यात आला. आरोपी राहुल कोळी याने लाचेची ७१ हजार ७०० रुपयांची रक्कम स्वीकारताच एसीबीच्या पथकाने त्याला रंगेहाथ पकडले.
या प्रकरणी जळगाव तालुका पोलीस ठाण्यात भ्रष्टाचार प्रतिबंधक अधिनियमांतर्गत गुन्हा दाखल करण्याची प्रक्रिया सुरू असून आरोपीला अटक करण्याची कार्यवाही सुरू असल्याची माहिती लाचलुचपत प्रतिबंधक विभागाने दिली. ही कारवाई पोलीस निरीक्षक रेश्मा अवतारे यांच्या नेतृत्वाखाली, पोलीस उपअधीक्षक योगेश आकुरे यांच्या मार्गदर्शनाखाली करण्यात आली.
