नवराज्य Live न्यूज नेटवर्क
जळगाव : पर्यावरण संवर्धनाचा संदेश समाजापर्यंत प्रभावीपणे पोहोचविण्याच्या उद्देशाने जळगाव जिल्हा पोलीस दल आणि नानासाहेब धर्माधिकारी प्रतिष्ठान यांच्या संयुक्त विद्यमाने जळगाव पोलीस मुख्यालयात भव्य वृक्षारोपण कार्यक्रमाचे आयोजन करण्यात आले. या उपक्रमांतर्गत एकूण २,३२० झाडांचे वृक्षारोपण करण्यात आले. कार्यक्रमाचे उद्घाटन जळगाव जिल्ह्याचे पोलीस अधीक्षक श्रीकांत धिवरे यांच्या हस्ते करण्यात आले. यावेळी त्यांनी पर्यावरण संरक्षण ही प्रत्येक नागरिकाची सामूहिक जबाबदारी असल्याचे सांगत वृक्षारोपणाबरोबरच त्यांचे संगोपन करणेही तितकेच महत्त्वाचे असल्याचा संदेश दिला
या उपक्रमात नानासाहेब धर्माधिकारी प्रतिष्ठानचे सुमारे ५५० सदस्य उत्स्फूर्तपणे सहभागी झाले. त्यांच्या श्रमदानातून पोलीस मुख्यालय परिसरात विविध प्रकारच्या देशी वृक्षांची नियोजनबद्ध पद्धतीने लागवड करण्यात आली. या माध्यमातून पर्यावरण संवर्धन, स्वच्छता आणि हरित परिसर निर्मितीचा संदेश देण्यात आला.
कार्यक्रमास अपर पोलीस अधीक्षक संदीप गावित, उपअधीक्षक (गृह शाखा) संजय गायकवाड, वरिष्ठ पोलीस निरीक्षक राहुल गायकवाड, राखीव पोलीस निरीक्षक प्रशांत सुगराव, जळगाव जिल्हा पोलीस दलातील अधिकारी व कर्मचारी, तसेच नानासाहेब धर्माधिकारी प्रतिष्ठानचे पदाधिकारी आणि सदस्य मोठ्या संख्येने उपस्थित होते.
