नवराज्य Live न्यूज नेटवर्क
मुंबई. : मुंबईतील प्रसिद्ध सहारा स्टार हॉटेल येथे आयोजित करण्यात आलेल्या ‘दादासाहेब फाळके टेलिव्हिजन अवॉर्ड्स २०२६’ या प्रतिष्ठित सोहळ्यात जळगाव येथील व फलटणच्या सुनबाई सौ. काजल रूतूराज भोईटे यांना ‘सर्वोत्कृष्ट मॉडेल’ (Best Model) या मानाच्या पुरस्काराने गौरविण्यात आले.
मॉडेलिंग क्षेत्रातील सातत्यपूर्ण यश, व्यावसायिकता, मेहनत आणि उल्लेखनीय योगदानाची दखल घेत हा पुरस्कार त्यांना प्रदान करण्यात आला. या सन्मानामुळे आंतरराष्ट्रीय मॉडेलिंग क्षेत्रात उदयोन्मुख मॉडेल म्हणून त्यांची ओळख अधिक भक्कम झाली आहे. तसेच मॉडेलिंग आणि फॅशन क्षेत्रात करिअर करण्याची इच्छा असलेल्या युवक-युवतींसाठी त्या प्रेरणास्थान ठरत आहेत.
यापूर्वीही सौ. काजल रूतूराज भोईटे यांनी भारताचे प्रतिनिधित्व करत ‘Mrs. Unity World Earth’ हा आंतरराष्ट्रीय किताब पटकावला होता. त्यांच्या या यशामुळे जळगाव जिल्ह्याचे नाव राष्ट्रीय आणि आंतरराष्ट्रीय स्तरावर उज्ज्वल झाले आहे.
सौ. काजल रूतूराज भोईटे या जळगाव जिल्हा मजूर फेडरेशनचे माजी सभापती रोहिदास मधुकर पाटील व सौ. ऊज्वला पाटील यांच्या कन्या आहेत. फॅशन आणि मॉडेलिंग क्षेत्रात त्यांनी आपल्या कौशल्याच्या बळावर वेगळी ओळख निर्माण केली असून, त्यांच्या या यशाबद्दल विविध स्तरांतून त्यांच्यावर अभिनंदनाचा वर्षाव होत आहे.
