नवराज्य Live न्यूज नेटवर्क
नूतन मराठा महाविद्यालयाला भारतीय अंतराळ संशोधन संस्था (ISRO) यांच्या START (Space Science and Technology Awareness Training) कार्यक्रमासाठी केंद्र म्हणून मान्यता मिळाली होती. या कार्यक्रमात महाविद्यालयातील एकूण 25 विद्यार्थी-विद्यार्थिनींनी सहभाग नोंदविला. त्यापैकी 15 विद्यार्थ्यांनी ‘A’ ग्रेड मिळवत उल्लेखनीय यश संपादन केले.
या यशस्वी विद्यार्थ्यांमधून टी.वाय.बी.एस्सी.चा विद्यार्थी प्रतीक अरुण निकुम याची ISRO अंतर्गत Indian Institute of Remote Sensing (IIRS), डेहराडून येथे आयोजित विशेष कार्यशाळेसाठी निवड झाली आहे. ही कार्यशाळा 26 जुलै रोजी आयोजित करण्यात आली असून त्यासाठी प्रतीक निकुम यांना अधिकृत निमंत्रण प्राप्त झाले आहे.
या कार्यशाळेसाठी जाण्या-येण्याचा थ्री-टियर एसी रेल्वे प्रवास तसेच निवासाचा संपूर्ण खर्च Indian Institute of Remote Sensing (IIRS), डेहराडून यांच्याकडून करण्यात येणार आहे.
या उल्लेखनीय यशाबद्दल नूतन मराठा महाविद्यालयात प्रतीक अरुण निकुम यांचा सत्कार करण्यात आला. यावेळी महाविद्यालयाचे प्राचार्य डॉ. एल. पी. देशमुख, उपप्राचार्य डॉ. के. बी. पाटील तसेच सायन्स असोसिएशनचे अध्यक्ष व भौतिकशास्त्र विभागप्रमुख प्रा. आर. बी. देशमुख यांनी त्यांचे अभिनंदन करून पुढील वाटचालीस शुभेच्छा दिल्या.
प्रतीक निकुम यांच्या या यशामुळे महाविद्यालयाच्या शिरपेचात आणखी एक मानाचा तुरा रोवला गेला असून इतर विद्यार्थ्यांसाठीही ही प्रेरणादायी बाब ठरली आहे.
