नवराज्य Live न्यूज नेटवर्क
जळगाव : शहरासाठी २५० कोटी रुपये खर्चून मेहरूण सर्व्हे क्रमांक ३४३ येथे उभारण्यात येत असलेल्या भव्य विभागीय क्रीडा संकुलाचे काम सध्या युद्धपातळीवर सुरू आहे. या महत्त्वाकांक्षी प्रकल्पामुळे शहराला आधुनिक आणि दर्जेदार क्रीडा सुविधा उपलब्ध होणार असून, संकुलाकडे जाणारा रस्ता देखील प्रशस्त आणि सुलभ असणे आवश्यक असल्याने त्या दृष्टीने गुरुवारी प्रत्यक्ष स्थळाची पाहणी करण्यात आली.
सध्या विभागीय क्रीडा संकुलाकडे जाण्यासाठी वापरला जाणारा रस्ता कच्चा आणि वहिवटीचा असल्याने भविष्यातील वाढती वाहतूक लक्षात घेऊन त्याचे नियोजन करण्याची गरज व्यक्त करण्यात आली.
या पाहणीवेळी विभागीय आयुक्त प्रवीण गेडाम (भा. प्र. से.), महापौर दिपमाला काळे, महापालिका आयुक्त आदित्य जीवने, जिल्हा परिषदेच्या मुख्य कार्यकारी अधिकारी करिष्मा नायर, प्रांताधिकारी विनय गोसावी, महापालिकेचे शहर अभियंता योगेश बोरोले, नगररचना विभागाचे अमोल पाटील यांच्यासह संबंधित विभागांचे अधिकारी उपस्थित होते.
पाहणीदरम्यान सध्या प्रत्यक्ष वापरात असलेलाच विद्यमान रस्ता विभागीय क्रीडा संकुलासाठी अधिकृतपणे उपलब्ध करून देण्याबाबत जळगाव महानगरपालिका आयुक्त, सहाय्यक संचालक (नगररचना) तसेच उपस्थित संबंधित अधिकाऱ्यांना स्पष्ट निर्देश देण्यात आले. या निर्णयानुसार आवश्यक प्रशासकीय प्रक्रिया तातडीने आणि प्राधान्याने पूर्ण करण्यात येणार असल्याचे सांगण्यात आले.
विभागीय क्रीडा संकुलाचा प्रकल्प पूर्ण झाल्यानंतर जळगाव शहरात राष्ट्रीय आणि आंतरराष्ट्रीय दर्जाच्या क्रीडा स्पर्धांसाठी आवश्यक सुविधा उपलब्ध होण्यास मोठी मदत होणार असून, शहराच्या विकासात हा प्रकल्प महत्त्वाचा टप्पा ठरणार आहे.
