नवराज्य Live न्यूज नेटवर्क
जळगाव : महानगरपालिकेच्या आरोग्य विभागातील हलगर्जीपणा आणि काही ठराविक अधिकारी व ठेकेदारांच्या फायद्यासाठी जळगावकरांच्या कराच्या पैशांची होत असलेली उधळपट्टी अखेर थांबण्याच्या मार्गावर आली आहे. उपमहापौर मनोज चौधरी यांनी गेल्या दोन महासभांमध्ये सातत्याने केलेल्या आक्रमक पाठपुराव्यानंतर कचरा डेपोवरील मनपाच्या स्वतःच्या मालकीचा वजन काटा अखेर सुरू करण्यात आला आहे.
मनपाकडे स्वतःचा वजन काटा उपलब्ध असतानाही, केवळ सुमारे तीन लाख रुपयांच्या दुरुस्तीअभावी तो अनेक महिन्यांपासून बंद अवस्थेत होता. यामुळे प्रशासनाकडून खाजगी वजन काट्यांचा वापर करण्यात येत होता आणि त्यासाठी लाखो रुपयांची बिले अदा केली जात होती. स्वतःची यंत्रणा असतानाही खाजगी यंत्रणांवर अवलंबून राहिल्यामुळे मनपाच्या महसुलावर मोठा ताण पडत होता.
याबाबत उपमहापौर मनोज चौधरी यांनी महासभेत प्रशासनावर जोरदार टीका करत, “जळगावकरांच्या टॅक्सच्या पैशांची उधळपट्टी थांबवली पाहिजे,” अशी भूमिका घेतली होती. त्यांच्या सातत्यपूर्ण पाठपुराव्यानंतर अखेर प्रशासनाने दखल घेत वजन काटा कार्यान्वित केला आहे.
आता थेट उपमहापौरांच्या दालनातून होणार देखरेख
कचरा डेपोवरील वजन प्रक्रियेत पारदर्शकता आणण्यासाठी आता सीसीटीव्ही कॅमेरे बसवण्यात येत आहेत. विशेष म्हणजे, या कॅमेऱ्यांचे लाईव्ह फीड थेट उपमहापौर मनोज चौधरी यांच्या दालनातील स्क्रीनवर दिसणार आहे. त्यामुळे कचऱ्याच्या वजनात होणारे संभाव्य घोळ, चुकीची नोंद किंवा आर्थिक गैरव्यवहारावर थेट नियंत्रण ठेवणे शक्य होणार आहे.
मनपा प्रशासनातील काही अधिकारी आणि ठेकेदारांच्या संगनमतामुळे होणाऱ्या कथित गैरप्रकारांना यामुळे मोठा आळा बसणार असल्याची चर्चा मनपा वर्तुळात सुरू आहे.
‘टीबी हाऊस’ येथील वजन काटाही लवकरच सुरू होणार
कचरा डेपोवरील वजन काटा सुरू झाल्यानंतर आता शहरातील ‘टीबी हाऊस’ परिसरात असलेला दुसरा बंद पडलेला वजन काटाही तातडीने दुरुस्त करून सुरू करण्याच्या सूचना उपमहापौर मनोज चौधरी यांनी प्रशासनाला दिल्या आहेत. त्यामुळे मनपाच्या महसुलातील गळती रोखण्यास मोठी मदत होणार असल्याचे सांगितले जात आहे.
