नवराज्य Live न्यूज नेटवर्क
वावडदा — एल.एच. पाटील इंग्लिश मीडियम स्कूल येथे आंतरराष्ट्रीय योगदिन मोठ्या उत्साहात साजरा करण्यात आला. या कार्यक्रमाच्या प्रमुख पाहुण्या म्हणून शाळेच्या मुख्याध्यापिका सौ. जयश्री साळुंखे उपस्थित होत्या.
कार्यक्रमाची सुरुवात विद्यार्थ्यांच्या शिस्तबद्ध मांडणीने झाली. शाळेतील विद्यार्थ्यांना रिफॉर्मर, परफॉर्मर, ग्लेडिएटर आणि वॉरियर्स अशा चार गटांमध्ये विभागण्यात आले होते. प्रत्येक गटाला अनुक्रमे लाल, हिरवा, पिवळा आणि निळा रंगाचा गणवेश देण्यात आला होता, ज्यामुळे संपूर्ण परिसर आकर्षक दिसत होता.
शाळेचे शिक्षक श्री. किशोर शिरसाट आणि शिक्षिका सौ. आशा बागुल यांनी आंतरराष्ट्रीय योगदिनाचे महत्त्व विद्यार्थ्यांना समजावून सांगितले. नियमित योगाभ्यासामुळे शारीरिक व मानसिक आरोग्य कसे सुधारते, याविषयी त्यांनी मार्गदर्शन केले.
यानंतर क्रीडा शिक्षक श्री. दिलीप चौधरी, शिक्षिका सौ. दीपिका नंदवलकर आणि संगीत शिक्षक श्री. कुशराजे पवार यांनी “राम आएंगे” या गीतावर सुंदर कवायत सादर केली. पुढे शिक्षिका श्रीमती प्राजक्ता पाटील यांनी योगाचे प्रात्यक्षिक समजावून सांगितले, तर क्रीडा शिक्षकांनी ते सादर करून दाखवले.
कार्यक्रमात इयत्ता 1 ली ते 10 वीपर्यंतच्या सर्व विद्यार्थ्यांनी तसेच शिक्षक व शिक्षकेतर कर्मचाऱ्यांनी उत्साहाने योगाभ्यास केला आणि आरोग्यदायी जीवनशैलीचे धडे घेतले.
या कार्यक्रमाच्या यशस्वी आयोजनासाठी मुख्याध्यापिका सौ. जयश्री साळुंखे यांचे मार्गदर्शन लाभले. तसेच शाळेच्या कॉर्डिनेटर अन्वेषा माहेश्वरी, प्राजक्ता पाटील आणि सर्व शिक्षक व शिक्षकेतर कर्मचाऱ्यांनी विशेष परिश्रम घेतले.
अशा प्रकारे आंतरराष्ट्रीय योगदिन शाळेत उत्साहपूर्ण वातावरणात साजरा करण्यात आला.
