नवराज्य Live न्यूज नेटवर्क
जळगाव – शहरातील लोकप्रिय आमदार तथा सर्वसामान्य जनतेच्या मनातील “राजूमामा” म्हणून ओळख असलेले आमदार सुरेश भोळे यांचा वाढदिवस १३ जून रोजी अत्यंत साध्या पण समाजोपयोगी पद्धतीने साजरा करण्यात आला. वाढदिवसानिमित्त शहरभर विविध सामाजिक, जनहितार्थ आणि लोकहितार्थ उपक्रमांचे आयोजन करण्यात आले होते.
भाजपच्या पाचही मंडळांमध्ये रक्तदान शिबिर, वृक्षारोपण, आरोग्य शिबिर, अन्नदान, शालेय साहित्य वाटप, कामगार महिलांना साड्यांचे वितरण, तसेच गोशाळांमध्ये गाईंना चारा व लापशी वाटप असे विविध उपक्रम राबविण्यात आले.
महापौर दीपमाला काळे यांच्या वतीने शाहूनगर येथील गोशाळेत गाईंना चारा वाटप करण्यात आले. मंडळ क्रमांक ३ मध्ये जितेंद्र चव्हाण यांच्या पुढाकाराने स्वामी समर्थ केंद्र, शारदाश्रम येथे भव्य वृक्षारोपण करण्यात आले. शिवाजीनगर येथे माजी नगरसेवक राजेंद्र मराठे व कार्यकर्त्यांच्या वतीने वृक्षारोपणाचा कार्यक्रम पार पडला.
जुने जळगाव येथे भाजपचे चिटणीस मिलिंद चौधरी यांच्या नेतृत्वाखाली भव्य आरोग्य शिबिर आयोजित करण्यात आले. पांझरा पोळ गोशाळेत गाईंना लापशी व चारा देण्यात आला. जिल्हा महानगराच्या वतीने सिव्हिल हॉस्पिटलमध्ये गरजू नागरिकांना अन्नदान तसेच रुग्णांना फळवाटप करण्यात आले.
मंडळ क्रमांक ३ चे अध्यक्ष अजित राणे यांच्या वतीने संत गाडगेबाबा निराधार केंद्र, भजगल्ली येथे सुमारे ७० महिला व पुरुषांना भोजन देण्यात आले. शासकीय निरीक्षण गृहातील मुलांना नगरसेविका अंकिता पाटील यांच्या वतीने जेवण देण्यात आले, तर भाजप कार्यकर्ते चेतन तिवारी व राहुल लोखंडे यांनी विद्यार्थिनींना कपड्यांचे वाटप केले.
मंडळ क्रमांक ४ अंतर्गत दत्त मंदिर, सद्गुरू नगर येथे प्रभाग क्रमांक १६ च्या नगरसेवकांच्या वतीने भव्य रक्तदान शिबिर आयोजित करण्यात आले. भाजप महिला मोर्चाच्या अध्यक्षा नीतूताई परदेशी यांच्या वतीने कामगार महिलांना साड्यांचे वाटप करण्यात आले. नगरसेवक अरविंद देशमुख यांच्या पुढाकाराने सिंधी कॉलनी सेवा मंडळासमोर नागरिकांसाठी आयुष्यमान कार्ड शिबिर आयोजित करण्यात आले होते.
दरम्यान, आमदार राजूमामा भोळे यांनी वाढदिवसानिमित्त बॅनरबाजी किंवा जाहिरातींवर खर्च न करता समाजोपयोगी कार्यात सहभागी होण्याचे आवाहन कार्यकर्त्यांना केले. दिनांक २१ जून रोजी गरजू विद्यार्थ्यांना भव्य वह्या वाटप कार्यक्रम आयोजित करण्यात येणार असून, त्यासाठी कार्यकर्त्यांनी पुष्पगुच्छ किंवा जाहिराती न देता जास्तीत जास्त वह्या जमा कराव्यात, असे आवाहन त्यांनी केले. या वह्या भाजप कार्यालय जी.एम. फाउंडेशन येथे चिटणीस मिलिंद चौधरी यांच्याकडे जमा करण्याचे सांगण्यात आले आहे.
या कार्यक्रमांना भाजप जिल्हाध्यक्ष दीपक सूर्यवंशी, महापौर दीपमालाताई काळे, स्थायी समिती सभापती डॉ. चंद्रशेखर पाटील, नितीन लड्डा, प्रकाश बालानी, माजी महापौर सीमाताई भोळे, माजी अध्यक्षा उज्वलाताई बेंडाळे, सरचिटणीस विशाल त्रिपाठी, भारतीताई सोनवणे, राहुल वाघ, जयेश भावसार, नितीन इंगळे यांच्यासह नगरसेवक, पदाधिकारी आणि असंख्य कार्यकर्ते उपस्थित होते.
