नवराज्य Live न्यूज नेटवर्क
जळगाव – मुलगा चुकीच्या मार्गाला लागू नये म्हणून जळगावातील एका प्रामाणिक आईने आपल्या १६ वर्षीय मुलाने चोरी केल्यानंतर घरात लपवून ठेवलेले ५ महागडे मोबाइल पोलिस ठाण्यात जमा केले. त्यानंतर जिल्हापेठ पोलिसांनी नवीन बसस्थानक परिसरातून प्रवाशांचे मोबाइल चोरणाऱ्या अल्पवयीन मुलाचा शोध घेऊन त्याला ताब्यात घेतले आहे. मुलाच्या गुन्ह्यावर पांघरूण न घालता त्याला धडा शिकवणाऱ्या मातेची शहरात चर्चा रंगली आहे.
अल्पवयीन मुलाने बसस्थानकातून चोरलेले हेच ते ५ मोबाइल.
आईच्या धाडसाचे जिल्हापेठ पोलिसांकडून कौतुक
पोलिसांनी दिलेल्या माहितीनुसार, या मुलावर यापूर्वी कोणताही गुन्हा दाखल नव्हता. त्याने पहिल्यांदाच चोरी केली; मात्र आईने दाखवलेल्या धाडस व प्रामाणिकपणामुळे हा मुलगा अट्टल गुन्हेगार होण्यापासून वेळीच वाचला. त्याच्या आईच्या धाडसाचे पोलिसांकडूनही कौतुक होत आहे.
नवीन बस स्थानक परिसरात २९ मे रोजी संकेत सुरेश नारखेडे हे आले होते. बसमध्ये चढताना-उतरताना होणाऱ्या गर्दीचा फायदा घेत अल्पवयीन चोरट्याने नारखेडे यांच्या पॅन्टच्या खिशातून १ लाख ३२ हजार रुपये किमतीचा महागडा आयफोन चोरला होता. याप्रकरणी ४ जून रोजी जिल्हापेठ पोलिस ठाण्यात गुन्हा दाखल करण्यात आला होता. नवीन बसस्थानक परिसरात सीसीटीव्ही कॅमेरे बंद व पोलिस चौकीत पोलिस कर्मचारीही हजर नसल्याचा फायदा घेऊन हा मुलगा गेल्या काही दिवसांपासून प्रवाशांचे मोबाइल चोरत होता. मोबाइल चोरी केल्यानंतर हा मुलगा ते घरात चोरून लपवून ठेवत होता; मात्र गेल्या काही दिवसांपासून मुलाच्या हालचाली संशयास्पद वाटत असल्याने त्याच्या आईने त्याच्यावर पाळत ठेवली. मुलगा घरात काहीतरी लपवत असल्याचे आईच्या मीक्ष्ण नजरेतून सुटले
नाही. तिने घरात तपासणी केली असता तिला एकामागून एक तब्बल ५ महागडे मोबाइल सापडले. मुलाने चोरीचा रस्ता पकडल्याचे लक्षात येताच या माउलीने जराही वेळ न घालवता ते ५ ही मोबाइल जिल्हापेठ पोलिस ठाणे गाठून जमा केले. आईनेच पोलिसांसमोर चोरी उघड केल्याचे समजताच घाबरलेला मुलगा घरातून बेपत्ता झाला. तर दुसरीकडे जिल्हापेठ पोलिस ठाण्याच्या कर्मचाऱ्यांनी तातडीने तपास चक्र फिरवून ९ जून रोजी या अल्पवयीन मुलाला शोधू त्याला ताब्यात घेत कायदेशीर नोटीस बजावली. याप्रकरणी पुढील तपास पोलिस कर्मचारी रवींद्र ठाकरे हे करीत आहे. दरम्यान, जमा केलेल्या मोबाइलमधून संकेत नारखेडे यांच्या मोबाइलची ओळख पटली असून, पोलिस आता उर्वरित मोबाइलच्या मालकांचा शोध घेत असून, मोबाइल मालकांनी पोलिस ठाण्यात संपर्क साधावा.
