नवराज्य Live न्यूज नेटवर्क
जळगाव : शहरातील हौशी गायक-गायिकांना आपली गायनकला सादर करण्यासाठी एक नवे व्यासपीठ उपलब्ध करून देणाऱ्या मनभावन कॅराओके क्लबचे उद्घाटन ज्येष्ठ विधिज्ञ अॅड. प्रविणचंद्र जंगले यांच्या हस्ते उत्साहात संपन्न झाले.
के. सी. ई. सोसायटी, जळगावचे अध्यक्ष प्रज्ञावंत नंदकुमार बेंडाळे यांच्या मार्गदर्शनाखाली तसेच प्रा. जयेंद्र लेकुरवाळे यांच्या संकल्पनेतून मनभावन कॅराओके क्लबची स्थापना करण्यात आली आहे. जळगावातील हौशी गायक-गायिकांना आपली गायनकला सादर करण्यासाठी, कलागुणांना वाव मिळवून देण्यासाठी आणि संगीतप्रेमींना एकत्र आणण्यासाठी हा उपक्रम सुरू करण्यात आला आहे.
उद्घाटनप्रसंगी अॅड. प्रविणचंद्र जंगले यांनी या उपक्रमाचे कौतुक करताना, कला आणि संस्कृतीच्या जतनासाठी अशा व्यासपीठांची आवश्यकता असल्याचे सांगितले. कॅराओके क्लबच्या माध्यमातून नवोदित तसेच अनुभवी गायकांना आपली कला सादर करण्याची संधी मिळणार असून, स्थानिक कलाकारांना प्रोत्साहन मिळेल, असा विश्वास त्यांनी व्यक्त केला.
यावेळी रेडिओ मनभावन ९०.८ एफ.एम. चे केंद्र संचालक अमोल यू. देशमुख यांनी सांगितले की, क्लबच्या माध्यमातून दर महिन्याच्या अखेरीस उत्कृष्ट गीताची निवड करण्यात येईल. निवडलेले गीत रेडिओ मनभावन ९०.८ एफ.एम.वर प्रसारित करण्यात येणार आहे. तसेच रेडिओच्या डिजिटल माध्यमांद्वारे कलाकारांचा आवाज जगभरातील श्रोत्यांपर्यंत पोहोचविण्याचा प्रयत्न केला जाणार आहे. एकाच क्षणात १५० हून अधिक देशांमधील श्रोत्यांपर्यंत आपली कला पोहोचविण्याची संधी या उपक्रमामुळे उपलब्ध होणार असल्याचेही त्यांनी नमूद केले.
कार्यक्रमास तंत्रज्ञ हर्षल भाटिया, आर. जे. शुभांगी बडगुजर,सूचित्रा लोंढे ,साहिल गायकवाड ,प्रा.रविंद्रकुमार बावणे,जितेंद्र अग्रवाल,भागवत पाटील,राजेंद्र सराफ ,संजय कोरांणे यांच्यासह हौशी गायक, संगीतप्रेमी आणि विविध क्षेत्रांतील मान्यवर उपस्थित होते.
सूत्रसंचालन व आभारप्रदर्शनानंतर कार्यक्रमाची सांगता झाली. मनभावन कॅराओके क्लबच्या स्थापनेमुळे जळगावातील गायन क्षेत्राला नवे व्यासपीठ मिळाले असून, स्थानिक कलाकारांच्या कलागुणांना चालना देण्यासाठी हा उपक्रम महत्त्वपूर्ण ठरणार असल्याची भावना उपस्थितांनी व्यक्त केली.
