नवराज्य Live न्यूज नेटवर्क
जळगाव स्थानिक स्वराज्य संस्था मतदारसंघाच्या विधान परिषद निवडणुकीसाठी भारतीय जनता पक्षाने अखेर नंदू (नंदकिशोर) महाजन यांच्या नावावर शिक्कामोर्तब केले आहे. उमेदवारीबाबत गेल्या काही दिवसांपासून राजकीय वर्तुळात विविध नावांची चर्चा सुरू असताना भाजपने शेवटच्या क्षणापर्यंत कमालीची गोपनीयता राखत आपली रणनीती कायम ठेवली. अखेर नंदू महाजन यांची उमेदवारी निश्चित झाल्याने सर्व तर्क-वितर्कांना पूर्णविराम मिळाला आहे.
विधान परिषद निवडणुकीची घोषणा झाल्यानंतर भाजपकडून उमेदवारीसाठी अनेक दिग्गज नेत्यांची आणि पदाधिकाऱ्यांची नावे चर्चेत होती. यामध्ये डॉ. केतकी पाटील, नंदू महाजन यांच्यासह उद्योजक नंदू अडवाणी, भाजपचे ज्येष्ठ नेते डॉ. राजेंद्र फडके,पाचोरा येथील पदाधिकारी अमोल शिंदे, मुख्यमंत्री वैद्यकीय सहायता कक्षाचे प्रमुख रामेश्वर नाईक तसेच माजी जिल्हा परिषद अध्यक्ष अशोक कांडेलकर यांच्या नावांचीही जोरदार चर्चा होती. मात्र पक्षश्रेष्ठींनी अखेर नंदू महाजन यांच्यावर विश्वास दाखवत त्यांना उमेदवारी जाहीर केली.
दरम्यान, महायुतीतून शिवसेनेकडूनही काही नावांची चर्चा सुरू होती. पालकमंत्री गुलाबराव पाटील यांचे सुपुत्र तथा माजी जिल्हा परिषद सदस्य प्रतापराव पाटील आणि आमदार किशोर पाटील यांचे सुपुत्र सुमीत पाटील यांच्या नावांकडेही राजकीय वर्तुळाचे लक्ष लागले होते. त्यामुळे या निवडणुकीसंदर्भात उत्सुकता शिगेला पोहोचली होती.
नंदू महाजन हे भाजपच्या संघटनात्मक कामात सक्रिय असून रावेर परिसरात पक्षवाढीसाठी त्यांनी महत्त्वाची भूमिका बजावल्याचे मानले जाते. लोकसभा, विधानसभा तसेच स्थानिक स्वराज्य संस्थांच्या निवडणुकांमध्ये त्यांनी संघटन मजबूत करण्यासाठी सातत्याने काम केले आहे. तसेच ते जलसंपदा मंत्री गिरीश महाजन यांचे निकटवर्तीय आणि पक्षनिष्ठ कार्यकर्ते म्हणून ओळखले जातात.
उमेदवारी निश्चित झाल्याची माहिती समोर येताच महाजन समर्थकांनी विविध ठिकाणी जल्लोष साजरा केला. आता नंदू महाजन सोमवारी आपला उमेदवारी अर्ज दाखल करणार असून या निवडणुकीतील पुढील राजकीय घडामोडींकडे जिल्ह्याचे लक्ष लागले आहे. भाजपच्या या निर्णयामुळे स्थानिक राजकारणात नव्या चर्चांना सुरुवात झाली असून आगामी निवडणुकीत कोणती समीकरणे आकार घेतात, याबाबत उत्सुकता वाढली आहे.
