नवराज्य Live न्यूज नेटवर्क
जळगाव :शहरातील रामदास कॉलनी भागात प्रस्तावित उद्यानाच्या (बगीचा) जागेची जळगाव शहराच्या महापौर दीपमाला काळे यांनी शुक्रवारी (दि. २२ मे) प्रत्यक्ष भेट देऊन पाहणी केली. या पाहणी दौऱ्यादरम्यान त्यांनी सुरू असलेल्या विकासकामांचा सविस्तर आढावा घेतला आणि उपस्थित अधिकाऱ्यांना आवश्यक त्या सूचना केल्या.
महापौर दीपमाला काळे यांनी उद्यानाच्या जागेवर जाऊन सुरू असलेल्या कामांची बारकाईने पाहणी केली. कामकाजातील छोट्या-छोट्या आणि महत्त्वपूर्ण बाबी जाणून घेत, हे काम दर्जेदार आणि वेळेत पूर्ण करण्याबाबत त्यांनी अधिकाऱ्यांना व ठेकेदारांना सांगितले.
या पाहणी दौऱ्यावेळी प्रभाग क्रमांक १२ मधील स्थानिक नगरसेवक आणि पदाधिकारी मोठ्या संख्येने उपस्थित होते. यामध्ये नगरसेवक नितीन बरडे, नगरसेविका उज्वला बेंडाळे, नगरसेविका गायत्री राणे, अनिल अडकमोल या सर्व स्थानिक लोकप्रतिनिधींनी प्रभागातील नागरिकांच्या दृष्टीने अत्यंत महत्त्वाच्या असलेल्या या उद्यानाच्या कामाबाबत काही महत्त्वपूर्ण सूचना मनपा अधिकाऱ्यांकडे मांडल्या. याशिवाय नगरसेविका ॲड. शुचिता हाडा यांचीही याप्रसंगी प्रमुख उपस्थिती होती.
उद्यानामध्ये आवश्यक असलेली चोहोबाजूने प्रकाश व्यवस्था, उद्यानात जे नवीन वृक्षारोपण केले जाणार आहेत त्या सर्वांना ठिबक पद्धतीने पाणी दिले जावे अशा महत्त्वपूर्ण सूचना महापौरांनी अधिकाऱ्यांना केल्या आहे. उद्यानाच्या कामात विविध विभागांचा समन्वय राहावा, यासाठी महानगरपालिकेचे वरिष्ठ अधिकारीही या दौऱ्यात सहभागी झाले होते.
यामध्ये शहर अभियंता योगेश बोरोले, विद्युत विभागाचे संदीप मोरे, पाणीपुरवठा विभागाचे घृष्णेश्वर साळुंखे, पर्यावरण विभागाचे प्रकाश पाटील यांच्यासह संबंधित विभागाचे ठेकेदार आणि मनपा कर्मचारी उपस्थित होते. महापौरांनी सर्व विभागांच्या अधिकाऱ्यांना परस्परांशी समन्वय साधून उद्यानाचे काम गतीने मार्गी लावण्याचे आदेश दिले आहेत. या उद्यानामुळे रामदास कॉलनी परिसरातील नागरिकांना एक चांगल्या दर्जाची विरंगुळ्याची जागा उपलब्ध होणार आहे.
