नवराज्य Live न्यूज नेटवर्क
जळगाव लाचलुचपत प्रतिबंधक विभागाने कारवाई केलेल्या सहकारी संस्थांच्या उपनिबंधकाच्या लॉकरमधून तब्बल १ कोटी ७ लाख ४४ हजार ७५ रुपये किमतीचे सोन्या-चांदीचे दागिने आणि रोख रक्कम जप्त करण्यात आली आहे. या कारवाईमुळे जिल्ह्यात मोठी खळबळ उडाली आहे.
आरोपी जगदीश बाबुराव बारी (वय ५६, रा. शांतीनगर, यावल रोड, भुसावळ) हे सहकार विभागातील वर्ग-१ अधिकारी असून त्यांच्याविरुद्ध जिल्हापेठ पोलीस ठाण्यात भ्रष्टाचार प्रतिबंध अधिनियमाच्या कलम ७ व १२ अन्वये गुन्हा दाखल करण्यात आला आहे. २० रोजी त्यांच्यावर यशस्वी सापळा कारवाई करण्यात आली होती. त्यानंतर त्यांना अटक करण्यात आली असून न्यायालयाने २३ मेपर्यंत पोलीस कोठडी सुनावली आहे.
दरम्यान, आरोपीच्या घरझडतीदरम्यान कॉसमॉस बँक, भुसावळ येथे लॉकर असल्याची माहिती लाचलुचपत प्रतिबंधक विभागाला मिळाली होती. त्यानुसार दोन पंचांच्या उपस्थितीत लॉकरची झडती घेण्यात आली. या झडतीत ६६०.३३० ग्रॅम वजनाचे सोन्याचे हार, बांगड्या व सोन्याचे बिस्किट असा ९९ लाख ४ हजार ९६० रुपये किमतीचा ऐवज मिळाला. तसेच ८ लाख ३६ हजार ५०० रुपयांची रोख रक्कम आणि २ हजार ६२५ रुपये किमतीचे चांदीचे दागिनेही जप्त करण्यात आले.
एकूण १ कोटी ७ लाख ४४ हजार ७५ रुपये किमतीचा मुद्देमाल जप्त करण्यात आला असून तो विभागाने ताब्यात घेतला आहे.
ही कारवाई पोलीस उपअधीक्षक योगेश ठाकूर, पोलीस निरीक्षक स्मिता नवघरे, पोलीस उपनिरीक्षक सुरेश पाटील, महिला पोलीस हवालदार संगिता पवार, पोलीस कर्मचारी प्रदीप पोळ, मनोज पाटील, अमोल सूर्यवंशी आणि चंद्रशेखर चौधरी यांच्या पथकाने केली.
