नवराज्य Live न्यूज नेटवर्क
तालुक्यात घडलेल्या हत्या प्रकरणानंतर बोदवड पोलीस ठाण्याच्या कामकाजावर गंभीर प्रश्नचिन्ह निर्माण झाले असून, कायदा व सुव्यवस्था राखण्यात झालेल्या निष्काळजीपणामुळे तीन पोलीस अधिकारी व कर्मचाऱ्यांवर निलंबनाची कारवाई करण्यात आली आहे. विभागीय चौकशीत वेळेत प्रतिबंधात्मक कारवाई करण्यात अपयश आल्याचे स्पष्ट झाल्यानंतर ही कारवाई करण्यात आली.
निलंबित करण्यात आलेल्यांमध्ये सहाय्यक पोलीस निरीक्षक दिपक सुरवडकर, एएसआय रविंद्र गुरचळ आणि हेड कॉन्स्टेबल नंदकिशोर धनके यांचा समावेश आहे. संबंधित वादप्रकरणात दोन्ही गटांमधील वाढता तणाव लक्षात घेऊनही आवश्यक कायदेशीर पावले उचलण्यात पोलिसांकडून हलगर्जीपणा झाल्याचे चौकशीत निष्पन्न झाले.
माहितीनुसार, दोन्ही गटांतील वादाची माहिती पोलीस प्रशासनाला आधीच मिळाली होती. प्रतिबंधात्मक कारवाईची जबाबदारी असतानाही आवश्यक चौकशी व कठोर उपाययोजना करण्यात आल्या नाहीत. परिणामी परिसरातील वातावरण अधिक तणावपूर्ण बनले आणि पुढे हत्या सारखी गंभीर घटना घडली.
चौकशी अहवालानुसार, टाऊन बीट प्रभारी एएसआय रविंद्र गुरचळ यांनी घटनास्थळी भेट दिल्यानंतर दोन्ही पक्षांना पोलीस ठाण्यात आणले होते. मात्र, कोणतीही ठोस कारवाई न करता त्यांना सोडून देण्यात आले. याचवेळी कठोर कारवाई केली असती तर पुढील अनर्थ टाळता आला असता, असे अहवालात नमूद करण्यात आले आहे.
दरम्यान, प्रभारी अधिकारी दिपक सुरवडकर यांनाही संपूर्ण वादाची माहिती फोन व व्हॉट्सअॅपद्वारे देण्यात आली होती. स्थानिक लोकप्रतिनिधींनीही परिस्थितीची गंभीरता त्यांच्या निदर्शनास आणून दिली होती. तरीही त्यांनी स्वतः कोणतीही तातडीची कारवाई केली नाही किंवा वरिष्ठ अधिकाऱ्यांना वेळेत माहिती दिली नसल्याचे चौकशीत समोर आले.
तीन्ही अधिकारी-कर्मचाऱ्यांच्या निष्क्रियतेमुळे परिसरातील कायदा व सुव्यवस्था ढासळली आणि अखेर गंभीर गुन्हा घडल्याचा ठपका विभागीय अहवालात ठेवण्यात आला आहे. या प्रकरणाची गंभीर दखल घेत संबंधित तिघांना तत्काळ प्रभावाने निलंबित करण्यात आले असून पुढील विभागीय चौकशी सुरू आहे.
