नवराज्य Live न्यूज नेटवर्क
जळगाव : शहरातील नव्याने उभ्या राहिलेल्या अनेक घरांची अद्याप घरपट्टी आकारणी न झाल्याने महानगरपालिकेचे मोठ्या प्रमाणात आर्थिक नुकसान होत असल्याची गंभीर बाब समोर आली आहे. या पार्श्वभूमीवर उपमहापौर मनोज सुरेश चौधरी यांनी अधिकाऱ्यांची संयुक्त आढावा बैठक घेत महसूल वाढीसाठी तातडीने प्रभावी उपाययोजना राबवण्याचे निर्देश दिले.
दि. २१ मे रोजी उपमहापौर मनोज चौधरी यांच्या दालनात उपायुक्त शिंदे मॅडम, हाऊस टॅक्स विभागीय अधिकारी, प्रभाग अधिकारी, टी.पी. अधिकारी तसेच नवीन घर मॅपिंग संबंधित कर्मचाऱ्यांची संयुक्त बैठक पार पडली. बैठकीत शहरातील नवीन बांधकामांचे सर्वेक्षण, घरपट्टी नोंदणी आणि महसूल वाढ यावर सविस्तर चर्चा करण्यात आली.
यावेळी उपमहापौर मनोज चौधरी यांनी स्पष्ट शब्दांत नाराजी व्यक्त करत सांगितले की, घर मॅपिंगसाठी महानगरपालिकेमार्फत करोडो रुपयांची एजन्सी नियुक्त करण्यात आली असताना अपेक्षित दर्जाचे काम होत नाही. अनेक नवीन बांधकामांची माहिती अद्याप नोंदवली गेलेली नसल्याने मनपाचे आर्थिक नुकसान होत आहे.
संबंधित एजन्सीने जबाबदारीने व काटेकोरपणे काम करून प्रत्येक नवीन बांधकामाची अचूक माहिती संकलित करावी व तत्काळ घरपट्टी आकारणी करण्यात यावी, असे निर्देश यावेळी देण्यात आले. तसेच कामात हलगर्जीपणा आढळल्यास संबंधितांवर जबाबदारी निश्चित करण्यात येईल, असा इशाराही उपमहापौरांनी दिला.
महानगरपालिकेचा महसूल वाढवण्यासाठी प्रशासनाने अधिक सक्षम, पारदर्शक व जबाबदारीने काम करण्याची गरज असल्याचे मतही बैठकीत व्यक्त करण्यात आले.
