नवराज्य Live न्यूज नेटवर्क
जळगाव : सार्वजनिक बांधकाम विभागातील (PWD) कथित भ्रष्टाचार प्रकरणाला आता नवे वळण मिळाले असून, लाचलुचपत प्रतिबंधक विभागाच्या कारवाईत अटक झालेल्या शाखा अभियंता योगेश अहिरे यांच्यासोबतच विभागातील वरिष्ठ अधिकाऱ्यांचीही चौकशी करण्याची मागणी पुढे आली आहे. या संदर्भात जिल्हाधिकारी रोहन घुगे यांच्याकडे तक्रार अर्ज सादर करण्यात आला आहे.
मुविकोराज मुरलीधर कोल्हे यांनी दिलेल्या तक्रारीत शाखा अभियंता योगेश अहिरे यांच्यासह अधीक्षक अभियंता प्रशांत पी. सोनवणे आणि कार्यकारी अभियंता आर. डी. पाटील यांच्या भूमिकेवर संशय व्यक्त करत सखोल चौकशीची मागणी केली आहे.
तक्रारीनुसार, सार्वजनिक बांधकाम विभागात विविध कामांची बिले मंजूर करण्यासाठी तसेच फाईल पुढे सरकवण्यासाठी मोठ्या प्रमाणावर बेकायदेशीर आर्थिक मागण्या केल्या जात असल्याचा आरोप करण्यात आला आहे. विनोबानगर परिसरातील सिमेंट काँक्रीट रस्त्याच्या कामाचे अंतिम बिल मंजूर करण्यासाठी तब्बल १५ लाख रुपयांची लाच मागण्यात आल्याचा दावा तक्रारीत करण्यात आला आहे.
या प्रकरणात लाचलुचपत प्रतिबंधक विभागाने शाखा अभियंता योगेश अहिरे यांना ५ लाख रुपयांची लाच स्वीकारताना रंगेहाथ अटक केली होती. संबंधित ठेकेदाराने एसीबीकडे तक्रार केल्यानंतर सापळा रचून ही कारवाई करण्यात आली होती. कार्यालयाबाहेरील कारमध्ये रक्कम स्वीकारण्याचा प्रयत्न सुरू असतानाच एसीबीच्या पथकाने धडक कारवाई केली होती.
तक्रार अर्जात या प्रकरणामागे वरिष्ठ स्तरावरील साखळी कार्यरत असल्याचा संशय व्यक्त करण्यात आला असून, संपूर्ण प्रकरणाची निष्पक्ष चौकशी करून दोषींवर कठोर कारवाई करण्याची मागणी करण्यात आली आहे. या घटनेमुळे सार्वजनिक बांधकाम विभागातील कारभार पुन्हा एकदा चर्चेत आला असून शहरात विविध चर्चांना उधाण आले आहे.
