नवराज्य Live न्यूज नेटवर्क
जळगाव उपनिबंधक सह संस्था, जळगाव येथील उपनिबंधक जगदीश बाबुराव बारी (वर्ग-१) यांच्याविरुद्ध लाचलुचपत प्रतिबंधक विभागाने मोठी कारवाई करत १ लाख ५० हजार रुपयांची लाच स्वीकारल्याप्रकरणी गुन्हा दाखल केला आहे. या प्रकरणात खासगी इसम देविदास धनसिंग पाटील याला लाचेची रक्कम स्वीकारताना रंगेहात पकडण्यात आले
लाचलुचपत प्रतिबंधक विभागाकडून मिळालेल्या माहितीनुसार, तक्रारदाराविरुद्ध अवैध सावकारी प्रकरणी चौकशी सुरू होती. या प्रकरणात तक्रारदार व त्यांच्या पत्नीविरुद्ध गुन्हा दाखल होऊ नये तसेच चौकशी अहवाल अनुकूल पाठविण्यासाठी उपनिबंधक जगदीश बारी यांनी सुरुवातीला ५ लाख रुपयांची लाच मागितली होती.तडजोडीनंतर ही रक्कम ३ लाख रुपयांवर निश्चित करण्यात आली.तक्रारदारांनी याबाबत १८ मे रोजी लाचलुचपत प्रतिबंधक विभाग, जळगाव येथे तक्रार दिल्यानंतर पंचासमक्ष पडताळणी करण्यात आली. या पडताळणीत जगदीश बारी यांनी लाचेची मागणी केल्याचे निष्पन्न झाले.
तसेच “मागील प्रकरणात तुम्ही वकील लावला म्हणून आमचे नुकसान झाले होते, त्यामुळे नकारात्मक अहवाल दिला होता. मात्र आता अनुकूल अहवाल पाठवितो,” असे सांगत त्यांनी लाचेची मागणी कायम ठेवली.यानंतर लाचेच्या रकमेपैकी पहिला हप्ता म्हणून १ लाख ५० हजार रुपये आरोपी देविदास धनसिंग पाटील यांच्याकडे देण्यास सांगण्यात आले. त्यानुसार बुधवारी सापळा रचण्यात आला. जळगाव जिल्हा अर्बन को-ऑपरेटिव्ह बँक्स असोसिएशन लिमिटेड, बी.जे. मार्केट, जळगाव येथे देविदास पाटील यांनी तक्रारदाराकडून १ लाख ५० हजार रुपयांची लाच स्वीकारताच एसीबीच्या पथकाने त्यांना रंगेहात पकडले.
या प्रकरणी जिल्हापेठ पोलीस ठाण्यात भ्रष्टाचार प्रतिबंध अधिनियम १९८८ च्या कलम ७ व १२ अन्वये गुन्हा दाखल करण्यात आला आहे.ही कारवाई पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक रेश्मा अवतारे यांनी केली. पथकात पोलीस निरीक्षक हेमंत नागरे, बाळू मराठे, संगीता पवार, मनोज पाटील व सचिन चाटे यांचा समावेश होता. तपास स्मिता नवघरे करीत आहेत.
