नवराज्य Live न्यूज नेटवर्क
जळगाव प्रतिनिधी : गेल्या अनेक दिवसांपासून चर्चेत असलेल्या जळगाव कृषी उत्पन्न बाजार समितीच्या सभापतीपदाच्या निवडीवर अखेर शिक्कामोर्तब झाले असून लक्ष्मण गंगाराम पाटील उर्फ ‘लकी टेलर’ यांची बिनविरोध निवड करण्यात आली आहे. यापूर्वी दोन वेळा सभापतीपदाची संधी हुकल्यानंतर अखेर यंदा त्यांची वर्णी लागल्याने राजकीय वर्तुळात “लकी अखेर खरेच लकी ठरले” अशी चर्चा रंगली आहे.
जळगाव बाजार समितीत महायुतीकडे स्पष्ट बहुमत असतानाही सभापतीपदाच्या निवडीदरम्यान मोठ्या राजकीय हालचाली घडत होत्या. काही महिन्यांपूर्वी शामकांत सोनवणे यांच्या विरोधात अविश्वास प्रस्ताव आणल्यानंतर सुनील महाजन यांची सभापतीपदी निवड करण्यात आली होती. मात्र अवघ्या सहा ते सात महिन्यांच्या कार्यकाळानंतर त्यांच्या विरोधातही संचालकांमध्ये नाराजी निर्माण झाल्याची चर्चा सुरू झाली आणि अविश्वास प्रस्तावाची तयारी सुरू झाली होती.
दरम्यान, संभाव्य राजकीय घडामोडी लक्षात घेता सुनील महाजन यांनी राजीनामा देत वरिष्ठ नेत्यांशी चर्चा केल्याची माहिती समोर आली. या पार्श्वभूमीवर मंत्री गिरीश महाजन, आमदार मंगेश चव्हाण आणि आमदार राजूमामा भोळे यांनी मध्यस्थी करत संचालकांशी संवाद साधला. त्यानंतर सभापती निवडीसंदर्भातील हालचालींना वेग आला.
सभापतीपदासाठी मनोज दयाराम चौधरी, मिलिंद चौधरी आणि लकी टेलर अशी तीन नावे चर्चेत होती. मात्र अखेरीस लक्ष्मण गंगाराम पाटील उर्फ लकी टेलर यांच्या नावावर सर्वानुमते शिक्कामोर्तब करण्यात आले. त्यांचा एकमेव अर्ज दाखल झाल्याने त्यांची बिनविरोध निवड जाहीर करण्यात आली.
निवड जाहीर होताच बाजार समिती परिसरात समर्थकांनी जल्लोष करत नूतन सभापतींचे स्वागत केले. यावेळी आमदार राजूमामा भोळे, आमदार मंगेश चव्हाण, राष्ट्रवादी काँग्रेसचे जिल्हाध्यक्ष संजय पवार यांच्यासह बाजार समितीचे संचालक आणि कार्यकर्ते मोठ्या संख्येने उपस्थित होते.
दरम्यान, प्रसारमाध्यमांशी संवाद साधताना आमदार मंगेश चव्हाण यांनी आगामी काळात उर्वरित कार्यकाळात तीन सभापती आणि तीन उपसभापती बदल होणार असल्याचे सूचक वक्तव्य केले. त्यांच्या या विधानामुळे बाजार समितीतील पुढील राजकीय समीकरणांबाबत नव्या चर्चांना उधाण आले आहे.
