जळगाव विधान परिषद निवडणुकीची रणधुमाळी सुरू; भाजप-शिवसेनेत उमेदवारीसाठी चुरस वाढली!

नवराज्यLive न्यूज नेटवर्क- जळगाव विधान परिषद स्थानिक स्वराज्य संस्था मतदारसंघाच्या निवडणुकीच्या पार्श्वभूमीवर जिल्ह्यातील राजकीय वातावरण चांगलेच तापू लागले आहे. भारतीय निवडणूक आयोगाने प्रदीर्घ काळ रिक्त असलेल्या विधान परिषद जागांसाठी निवडणूक कार्यक्रम जाहीर केला असून, जळगाव मतदारसंघासाठी येत्या १८ जून २०२६ रोजी मतदान होणार आहे. तर २२ जून रोजी मतमोजणी पार पडणार आहे.माजी आमदार चंदूभाई पटेल यांचा कार्यकाळ संपल्यानंतर रिक्त झालेल्या या जागेसाठी आता नव्या चेहऱ्यांकडून जोरदार राजकीय हालचाली सुरू झाल्या आहेत. महायुतीसह विविध पक्षांमध्ये उमेदवारीसाठी इच्छुकांची संख्या वाढत असून, पक्षश्रेष्ठींकडे लॉबिंगला वेग आला आहे.

या निवडणुकीत नव्याने निवडून आलेले महापालिका नगरसेवक, नगरपालिका व नगरपंचायतीचे सदस्य तसेच लोकनियुक्त नगराध्यक्ष मतदान करणार आहेत. मात्र, जिल्हा परिषद सदस्य आणि पंचायत समिती सभापती यांना मतदानाचा अधिकार नसल्याचे स्पष्ट झाले आहे.

भाजपाकडून नंदू अडवाणी, नंदू महाजन तसेच माजी खासदार डॉ. उल्हास पाटील यांच्या कन्या डॉ. केतकी पाटील, रोहित निकम, सुनील भंगाळे,यांच्या नावांची जोरदार चर्चा सुरू आहे. दुसरीकडे शिवसेनेकडूनही या जागेवर दावा करण्यात येत असून, पालकमंत्री गुलाबराव पाटील यांचे पुत्र तसेच माजी जिल्हा परिषद सदस्य प्रतापराव पाटील हे देखील इच्छुक असल्याने पक्षांतर्गत हालचाली वाढल्या आहेत. त्यामुळे आगामी काळात उमेदवारीवरून राजकीय समीकरणे बदलण्याची शक्यता व्यक्त केली जात आहे.

निवडणूक आयोगाच्या नियमानुसार, स्थानिक स्वराज्य संस्था मतदारसंघातील किमान ७५ टक्के स्थानिक स्वराज्य संस्था कार्यरत असणे आणि किमान ७५ टक्के लोकप्रतिनिधी पदावर असणे आवश्यक असते. पूर्वी या अटी पूर्ण न झाल्याने निवडणूक रखडली होती. मात्र, आता आवश्यक निकष पूर्ण झाल्याचा अहवाल राज्य निवडणूक अधिकाऱ्यांकडून सादर करण्यात आल्यानंतर निवडणूक कार्यक्रम जाहीर करण्यात आला आहे.

असे आहे निवडणूक वेळापत्रक

अधिकृत अधिसूचना जारी : २५ मे २०२६

उमेदवारी अर्ज दाखल करण्याची अंतिम मुदत : १ जून २०२६

अर्ज छाननी : २ जून २०२६

उमेदवारी अर्ज मागे घेण्याची अंतिम तारीख : ४ जून २०२६

मतदान : १८ जून २०२६

मतदानाची वेळ : सकाळी ८ ते दुपारी ४

मतमोजणी व निकाल : २२ जून २०२६

जळगाव विधान परिषद निवडणुकीच्या निमित्ताने जिल्ह्यात पुन्हा एकदा राजकीय रणनीती, गटबाजी आणि शक्तीप्रदर्शनाला वेग येणार असल्याचे चित्र सध्या दिसून येत आहे.