नवराज्य Live न्यूज नेटवर्क
राज्याचे ज्येष्ठ नेते तथा मंत्री गिरीषभाऊ महाजन यांच्या ६६ व्या वाढदिवसानिमित्त योगराज फाऊंडेशन मुक्ताईनगरचे अध्यक्ष व भारतीय जनता पक्षाचे तालुका नेते विनोदभाऊ सोनवणे यांच्या वतीने शिरसाळे मारूती, ता. बोदवड येथे विविध धार्मिक व सामाजिक उपक्रमांचे आयोजन करण्यात आले.
यावेळी नामदार गिरीषभाऊ महाजन यांच्या हस्ते मारूती मंदिरात महाआरती करण्यात आली. वाढदिवसानिमित्त मुक्ताईनगर व बोदवड तालुक्यातील विविध गावांमध्ये नागरिकांना लाडू वाटप करून उत्साहात वाढदिवस साजरा करण्यात आला. या उपक्रमाला नागरिकांचा उत्स्फूर्त प्रतिसाद लाभला.
योगराज फाऊंडेशन मुक्ताईनगरचे अध्यक्ष तथा भाजपचे तालुका नेते विनोदभाऊ सोनवणे यांनी गेल्या अनेक वर्षांपासून मुक्ताईनगर व बोदवड तालुक्यात सामाजिक, शैक्षणिक व आरोग्य क्षेत्रात उल्लेखनीय कार्य केले आहे.
कोरोना महामारीच्या कठीण काळात अनेक रुग्णांना उपचार, औषधे, अन्नधान्य तसेच आवश्यक मदत उपलब्ध करून देण्यात विनोदभाऊ सोनवणे यांनी मोलाची भूमिका बजावली होती. त्यांच्या या सामाजिक कार्याची दखल घेत अनेकांनी त्यांचे कौतुक केले.
शिरसाळे मारूती येथे आयोजित कार्यक्रमात बोलताना नामदार गिरीषभाऊ महाजन यांनी विनोदभाऊ सोनवणे यांच्या सामाजिक कार्याचे विशेष कौतुक केले. “समाजातील शेवटच्या घटकापर्यंत मदत पोहोचविण्याचे कार्य विनोदभाऊ सातत्याने करत आहेत. युवकांना दिशा देणे, गरजूंच्या पाठीशी उभे राहणे आणि विकासासाठी कार्यरत राहणे ही त्यांची कार्यपद्धती प्रेरणादायी आहे,” असे गौरवोद्गार त्यांनी काढले.
तसेच मुक्ताईनगर व बोदवड तालुक्याच्या सर्वांगीण विकासासाठी आपण सदैव कटिबद्ध राहू, तसेच विनोदभाऊ सोनवणे यांच्या पाठीशी खंबीरपणे उभे राहून विकासकामांना गती देण्यासाठी प्रयत्नशील राहू, अशी ग्वाहीही त्यांनी यावेळी दिली.
दरम्यान, गिरिषभाऊ महाजन यांच्या ६६ व्या वाढदिवसानिमित्त जळगाव शहरात भव्य ६६ फुटांचे कटआऊट उभारण्यात आले असून, जळगाव शहराच्या इतिहासातील आजपर्यंतचे हे सर्वात मोठे कटआऊट ठरत आहे. कार्यकर्त्यांमधील उत्साह आणि गिरिषभाऊंप्रती असलेले प्रेम याचे हे प्रतीक मानले जात आहे. हे भव्य कटआऊट नागरिकांचे विशेष आकर्षण ठरत असून, संपूर्ण परिसरात उत्साहाचे आणि जल्लोषाचे वातावरण निर्माण झाले आहे.
